أنا خسرت اتنين من أعز أصدقائي حقيقي عشان مارسوا معايا الصمت العقابي (اللي زمان كان اسمه قمصة)..

خسرتهم عشان بسكوتهم عن التغير في علاقتنا لفترة بدون عتاب فوري مسحتهم من يومي ومن تفاصيله،

عشان قعدت أول فترة أحاول أفهم فيه إيه أو انا غلطت في إيه واسأل وأهتم واتحايل ومفهمتش التغيير جه منين فمسحتهم ونسيت وجودهم فعلا..

حتى لما اتقالي السبب من حد فيهم بعدين كنت خلاص قلبي اتقفل ناحيتها تمامًا ومهما حاولت مقدرتش رغم حبي العميق فعلا ليها.. والتاني معرفش السبب ومحاولتش أدور وراه بس يوم ورا يوم خلاص تلاشت المساحة بينا عشان مع التغير الأول سألت فيه إيه مليون مرة من غير إجابة..

قبل ما تمارس الصمت العقابي على شخص تأكد من أهمية كلامك الأول وأوانه اللي يتقال فيه، وإن الشخص اللي عاوز يسمعك النهاردة ممكن بكرة ميفتكركش أصلا.