جماعة..

أنا مبتفرجش على التليفزيون زي مانتم عارفين بس في كلامي مع حد قالي عن مشهد في مسلسل الهرشة السابعة اللي طالعين بيه القلعة إن جوزها جه بيقولها إنه خد ترقية في شغله فبدل ما تفرح وتباركله ردت بتأفف وقالتله كويس إن على الأقل حد مننا حس بده وقعدت تندب حظها إن هي محققتش حاجة في حياتها غير تربية الولاد وإن هي ملهاش لازمة ولا كيان..

فأنا من موقعي هذا عاوزة أقول إن ده سم في عسل أسود ومنيل خاصة للأمهات الجدد، وإن دور الست الأول والأسمى هو تربية أفراد منتجين ورحماء وذوي مبادئ في المجتمع، ومساندة جوزها وتشجيعه على تحقيق ذاته، ودعمه معنويا ونفسيا إنه ياخد مكانته كاملة عشان يقدر يؤدي دوره وبالتالي يقدر يلبي طلباتها ويساعدها في أداء دورها، والعكس صحيح..

وإن العلاقة الزوجية السوية هي علاقة تكاملية فيها الطرفين بيفتخروا ببعض وبإنجازات بعض وبيعتبروا نفسهم شخص واحد وسند لبعض وبينهم احترام للمكانة والدور وتقدير لمجهود كل واحد منهم في مكانه اللي من غيره مش هتستوى حياة الآخر..

وإن الزواج هو أعظم علاقة إنسانية ربنا شرعها بس إحنا اللي دخلنا فيها ولعبنا في أساسها وخربناها فبقت البيوت بدون أساسات وأعمدة من المودة والرحمة والأنس والسكينة أوهن من بيت العنكبوت بتطربق على اللي فيها من اقل ريح غضب.

بس كدة.

#DINA_MONIR