الزمن يمنتج فقرات ضعفي

محدش يعرف اللي جواك فعلا غيرك أنت وربنا، الناس ليها الظاهر وحتى أفعالك بيتم تفسيرها حسب عقل وتفكير اللي بيشوفها مش حسب نيتك فيها..

كل اللي حواليك ممكن ينبهروا بقوتك وثباتك ونجاحك وإنك مكمل وأنت بس اللي عارف إنك مهزوم إيدك بتترعش وخايف ومش قادر تعبر، ولو قدرت فأنت معندكش اللي يهتم يسمع فعلا بدون فضول أو تأفف..

أنت لوحدك اللي عارف إنك تكيفت مع الاكتئاب المزمن وانتكاساته واضرابات النوم ونوبات الفزع لأن مفيش وقت تقع وتقوم، محدش هيسندك لما تقع ومحدش هيستناك لحد ما تقوم.. الزمن هيمنتچ الفقرة ديه وهيسيبك مع الوحدة تاكلك لحد ما تقوم تكمل تمثيل مع الناس إنك تمام وزي الفل أهو.. بتعاقب نفسك على الضعف الإنساني كأنه جريمة لأنه رفاهية ملهاش معنى في قاموسك.. 

التعامل مع مشاعرك سواء حب أو احتياج أو خوف أو تعب أو وحدة ملهومش أي وزن، ولا يمثلوا فرق في حياة أي حد على وجه الأرض... بل إنهم عبء عليك وعلى غيرك فأنت مضطر تخبي مشاكلك ديه وتزود ضغط التمثيل وإلا حياتك فعلا هتبقى فاضية تماما من الأشخاص اللي بتمثل على عقلك إنهم حواليك...