الوحدة بتلحس المخ، بتخلي الإنسان مقفول على نفسه وروحه مشتتة جواه مش عارف هو عاوز إيه حتى لو عنده كل شيء في الدنيا.. 

الوحدة بمعنى إنه معندوش حد يشاركه يومه واختياراته وقراراته ونتايجها، معندوش حد يسأل عليه لما يغيب ويعمل حسابه ويستناه بحب، معندوش حد يومه وحياته مبتمشيش من غيره باختياره وبمزاجه مش بالواجب أو الفطرة..

إن دماغه بس اللي سيقاه وماشي في الدنيا بوشه وبيتعامل باللي شايفه بس ومفيش ونس يستناه اخر اليوم يشاركه فرحه وحزنه.. 

لو عندك أي فرصة لعلاقة صداقة حقيقية أو زواج يرضي روحك متخليش الشيطان يحلي في عينك الوحدة لحد ما تبلعك وتحس إنك عبء على الكل، امسك فيها وحافظ على فطرتك وونس قلبك زي ما ربنا ونس آدم بحواء ومتخافش.

#DINA_MONIR