أول ما ربنا رزقني قررت اني اربي ولادي على الانسانية، مش عاوزة حاجة منهم غير ان ربنا يديهم الصحة وعلاقتهم بيه تبقى كويسة، ميهمنيش يبقوا دكاترة ولا مهندسين ولا اي حاجة، عاوزاهم سعداء بسطاء بني ادمين.

احنا ساعات وبدون ما نشعر بنربي وحوش، اول ما تكبر تاكلنا، الحمدلله وبفضله ومنته ربنا اكرمني بان ولادي بني ادمين مش وحوش، وده بفضله مش بشطارتي، انا حاولت وربنا بارك، 

الدكتورة عبلة الكحلاوي كانت تقول(مالك عرفت تربي قال من عند ربي)

المسلسل ده من كتر صدقه وواقعيته خدني لحالة جميلة خصوصا ان نموذج الأم العائلة والأب العائل موجودين وبكثرة.

 وانصدمت اد ايه ممكن ام او اب يكرسوا حياتهم لعيالهم واول ما تجيلهم فرصة للسعادة العيال يستكتروها عليهم، مع ان

لا ربنا طلب من حد يضحي بحياته ولا اي انسانية ولا اي منطق رحيم يطلب من انسان حتى لو ام او اب يضحي في الوقت اللي ممكن الكل يعيش ببساطة،

كنت قاعدة مع مجموعة من صديقاتي وجت سيرة الصحابية الجليلة اسماء بنت عميس ، وحكيت لهم حكاية اسماء بنت المحظوظة 

اسماء تزوجت سيدنا جعفر ابن عم سيدنا النبي صلى الله عليه وسلم ، سيدنا جعفر ده كان شاب زي القمر ومرح ورومانسي واكتر واحد شبه سيدنا النبي صلى الله عليه وسلم ، تصوروا!!

تزوجته اسماء وانجبت منه، لما استشهد تزوجت بعده سيدنا ابو بكر، تخيلوا تبقى متجوزة واحد شبه سيدنا النبي صلى الله عليه وسلم ومن ال البيت وتخلف منه ويستشهد وتروح تتجوز بعده ومين؟ سيدنا ابو بكر ولما مات سيدنا ابو بكر، سكتت اسماء؟ لا، تصوروا انها راحت اتجوزت لتااالت مرة مين بقى؟ سيدنا علي بن ابي طالب اخو زوجها الاولاني، وانجبت منهم، حد اتكلم؟؟ حد قال عليها حرف ولا مس كرامتها واخلاقها ؟ ولا قال ليه متضحيش وتنكفي على ولادها ؟؟ ولا لمح لشيء؟ فضلت صحابية جليلة، وربنا رزقها بكل زوج انقح من التاني ????

احنا اخترعنا ف الزواج والطلاق دين جديد يا اخوانا، مجتمعنا متوحش وكتير مننا ساعده على التوحش،

 نصيحة لما تيجي تربي سيبك من دروس السباحة والافورة والدروس الخصوصية والهيصة والخايلة الكدابة اللي اخترعتها الطبقة الوسطى، اعملهم ماشي بس بقدر مش بهوس وإحداث، 

لما تيجي تربي ربي فقط فقط فقط بني ادمين مش وحوش .

دينا عاصم