وا حوْستاااه "بصوت عبدالسلام النابلسي

دندنات، 

(استفزازي بشكل ممنهج عبر الماسنجر - صبيانية الكبار - دينا حاف إزاي آجدع - احكي لي عن نفسك يا دينا - 

وا حوْستاااه "بصوت عبدالسلام النابلسي)

الحقيقة ان عالم فيسبوك مليء بالعجائب والغرائب والمضحكات المبكيات وكنت فيما مضى أعتبره عالما خياليا افتراضيا ولكنه في الفترة الأخيرة وبعد سنوات من التصنع، اصبح مجتمعا مصغرا يشكل مرآة لكل ما يدور على أرض الواقع وانخلعت الأقنعة والناس "رحرحت" وفكت التنس tension وأصبح هناك مجال للتأمل والاعتبار والاتعاظ كمان.

وكثيرا ما أتساءل، ألا يوجد ميثاق "شرف" لهذا الفضاء الأزرق؟؟ اتفاق يعني بإرساء أدبيات كده منطقية وإنسانية في التعامل عبر الفيسبوك، لأني لاحظت ان كثيرا من المرتادين لهذا الفضاء أدبياتهم وسلوكياتهم بعافية شوية، 

 وهناك عادات سيئة جدا وكان الواحد في الماضي يترفع عن مثل تلك "الحماقات الصبيانية" حلو صبيانية دي :)

لكن الموضوع زاد وتورط فيه ناس كباره كده 

الواحد ممكن يكتب على فيسبوك معلومة، قصة تضحك، او قصة نعتبر بها، صورة حلوة، فيديو لطيف، دعاء حلو، حد مضايق فيدخل يفضفض ويلاقي الناس بتتعاطف وتقول له كلام لطيف ممكن ينقذه من حالة سيئة، هو ده المفروض يحصل، اسعدوا بعض يا جماعة، حبوا بعض، او حبوا نفسكم أكتر من كده

نرجع مرجوعنا للماسنجر

1-فيه "صديق للصفحة" لقيته دخل فجأة على ماسنجر يناديني "دينا" كأننا كنا بنتكلم وبيننا حديث انقطع أو كأننا قاعدين واكلين شاربين مع بعض!

دينا حاف كده واحنا منعرفش بعض يا فندم؟؟؟ يالهوي :) طبعا لم ارد عليه وقلت "يا واد طنث خااالث"

وطالما لم ارد فهذا في حد ذاته رد ابن لذينا

واعتقد انه فهم ان مافيش بينا حوارات اصلا ولا حتى تعليقات علشان يرفع الكلفة كده فجأة وبدون مقدمات ولا سلام عليكم ولا مساء الخير ويدخل يناديني/ طيب لو عاوز اي طلب مفيش مشكلة على راسي يا فندم لو اقدر، لكن مترفعش التكليف للدرجة دي، طيب ابدأ بالسلام عليكم من فضلك كذا كذا...... اي حاجة لكن حضرتك كده ناقص تنزل لي "السبت" من البلكون وتقوللي حطي لي اتنين كيلو طماطم ونقيها كويس لو سمحتي :) 

2- حد تاني وجدت بيننا اصدقاء مشتركون ومركز عالي وتايتل محترم وناس عمالة تبجل فيه، والصفحة تعج بالايات الدينية والأحاديث والتسابيح والعظات والدراما والعبر قلت ماشي، أول ما قبلته دخل على الخاص يقوللي"ها...احكي لي بقى عن نفسك يا دينا,, انا سامع" 

ياخراشي ؟؟؟؟؟ ازاي آجدع؟؟؟

بجد؟؟؟ بجد يا عم انت؟؟؟ انت فعلا انسان بجد عادي؟؟؟ طب ثاننننية واحدة أروح اجيب لك البلوك وارجع لك

الثقة اللي بيتكلم بها شككتني في نفسي، حسيت منها اني خلاص الشيزلونج مفرود وهاقول له"الحكاية بدأت لما فتحت صفحة على فيسبوك في 2010"

واحكي له عذاباتي ومعاناتي وابكي واسأله يا ترى فيه أمل يا دكتور؟؟؟

طبعا ده عملت "سين" للرسالة وبلوك جميل يليق بميوله المريبة للتحليل النفسي خاصة للستات والبنات بالذات طبعا لأنه بالتأكيد لن يسعد بالاستماع لقصة حياة اي رجل !!

4-طيب بلاش / خدوا دي، ليه الناس تدخل تلقح على بعض وترسل برسائل مبطنة وضمنية سمجة وتعمل الشغل "باردون يعني الشغل البلدي ده، عيب اوي يا جماعة بجد ليه كثير من المصريين بس هما اللي بيدخلوا يقللوا من نفسهم كده ورجال وسيدات ، طب مش عيب؟؟

5-طيب ليه حد يكون في غرفة الرعاية المركزة ويوصي حد يصوره ؟ ليه يا جماعة ده حتى المرض عورة، ممكن تكتب انك مريض وتطلب من الناس الدعاء، لكن ليه مناظر صعبة ليه؟ ليه نشوف الواوا ؟ انت فايق للتصوير؟؟؟

 الواحد ممكن يكتب بغرض الناس تدعي له او تدعو للميت او تترحم لكن تنزل صورة "التعويرة" ليه انت ف ايه ولا ايه يا عم؟؟ ربنا يعافيك ويشفيك، لكن لازمة الصورة ايه، عشان عين الحسود يعني؟ طيب هو محدش بيتحسد غير المصريين؟؟؟

6- حد تاني على طول بينزل صوره وهو سعيد ويكتب كلام لطيف، وده فعلا بيبقى انسان جميل وبرينس واكيد عنده مشاكل وهموم زي اي حد فينا لكن بيحتفظ بها لنفسه وده اسمه الستر بتاع ربنا ان حالنا في النعمة مثله في عكسها ولكن ربنا ساترنا، ده له تعظيم سلام بجد

في المقابل واحد ينزل صورة عربيته عملت حادث، مفروض يكتب الحمدلله ربنا كتب لي عمر جديد، لكن تلاقيه يكتب" ابعدوا عنيكم عني" 

طيب نعمل فيك ايه وانت متعذب ومتشرد ومتقطع بين الفشخرة الكدابة والخوف من الحسد، حضرتك خايف من الحسد ابعد عن فيسبوك حاجتك وبيتك وعيالك وعربيتك لكن الاتنين في واحد مينفعش خالص مالص يا فندم.