*احنا يا جماعة هنحاول "نحسن البيئة الضيقة جدااا" اللي حوالينا لأننا "حاليا" مش حمل تغيير حكومات ولا سياسات ولا قيادات، طبعا انا كلي ثقة في ربنا هو ده الامل الوحيد وكفى به وعندي احساس ان ربنا مش هيسيب البلد دي اللي تجلى على ارضها واتسمع صوته فيها، إنما إنما إنما "وركزوا معايا" هنعمل ما نقدر عليه في اهم حاجة وهي "طلبات البيت"

1-اللبن هنجيبه "سايب" في حدود 18 الى 20 جنيه للكيلو ونغليه كذا مرة ونضع فيه "قطعة زجاج مدورة بتتباع في المحلات علشان لا يفور ويندلق "طبعا انظف وافضل وشوية والعيال هيتعودوا على طعمه ويعيشوا عيشة اهاليهم ويبقى أصح كمان"هنشيل القشطة "واوعوا ترموا حااااجة على رأي سمير غانم اوعوا ترموا حاجة خصوصا القشطة "يالهوي باموت فيها" جمعوها وهنستعملها فحاجات كتير جميلة هناكلها مع عسل ابيض تبقى ديزرت او نحطها على الجبن القريش تقلبها جبنة دوبل كريم بأقل تكاليف"

2-الدجاجة "تطلبي من الفرارجي يقطعها 8 قطع علشان ترمي معاك وتقسميها أكلتين بدل أكلة، ولو بانيه يقطعها "شرايح" ونقسم الكيلو نصفين ونضع عليهم كمية كبيرة لا باس بها من الخضار والبصل بانواعه تكفي وجبتين بدل وجبة مع العيش او مع الأرز وكمان صحية أكتر علشان خضروات أكتر

"نفس الحكاية مع اللحم" لو مصممة يبقى مكعات صغري حجم المكعب واقسمي على وجبتين او اعمليها شرايح وسويها زي الفراخ فوق

3- فيه اختراع اكتشفته مؤخرا اسمه "البصل الأخضر والكرات" ده يا جماعة طعمه وريحته مع الاكل حلوة جدا زي البصل العادي وسهل يتقطع "وريحته مش بتثبت في الايد" ودي حاجة مهمة عندي جدااا ورخيص أرخص من البصل العادي كمان، اكتشفته في "الرحاب" ولقيت الناس عليه أمم وبيتجاب بالطلب "ياحلولو" والله

4- الارز هنجيبه سايب من العطار وكذلك المكرونة ارخص من السوبر ماركت وممكن نستخدم الفريك من عند العطار بدل الأرز وده بقى حكاية والله لو نسقيه بشوربة فراخ ونحط جواه ما تيسر من شرايح فراخ أو لحمة هيبقى وجبة كاملة زي الفل

5- هنتابع صفحات الستات وكل بنت او ست شافت عرض كويس في مكان سوبر ماركت ملابس براندات اوتلت "outlet"هتعلن عنه على صفحتها او على اي جروب ومحدش بياخد رزق حد بالعكس ربك بيبارك للطيبين

عندكم بقى اللحمة المفرومة بقى عصجي ببصل كتير وفلفل الوان وفلفل حامي وقسمي واطبخي عليها اي خضار مع الرز

كفتة الرز هايلة موفرة جدا ومتكاملة

6- اهم حاجة بقى، وخليتها للاخر لأني صحفية واخر جملة هي اخر حاجة بتثبت في ذهن القارىء اهم عقبة وما ادراك ما العقبة فك رقبة او اطعام في يوم ذي مسغبة يتيما ذا مقربة أو مسكينا ذا متربة، يعني هو ده طوق النجاة يا جماعة حرفيا من اي ضيق وهي دي العقبة الوحيدة قدامنا وهي دي الايام اللي فيها مسغبة يعني اشتهاء الفقير للقمة بجد زي ما ربنا قال.

مش هتقدري يا ست البيت تعملي اطعام زي زمان لناس كتير اعملي حسابك في وجبة واحدة وخلي ابنك ينزلها لأي عابر او يدخلها الجامع او ينزلها لابن البواب اللي بيلعب ف الشارع، باكو بسكويت، ساندويتش بطاطس متحبش سلطة وبهارات، اي حاجة يا ستي

7- عندك عيل تعبان اطعمي او ظروف مهببة اطعمي، نفسك في حاجة ربنا يحققهالك اطعمي، عاوزة ربنا يهدي جوزك اطعمي، الاطعام يهدي لك كل عاصي بأمر الله فخلي بالك

8- فيه على صفحتي أئمة جوامع ومشايخ وقساوسة ولاد حلال يا ريت تكتتبوا وتجيبوا تلاجة في المسجد او الكنيسة وولاد الحلال يضعوا فيها ما تيسر والناس تحط فيها اللي يقدروا عليه يوميا اي حاجة ان شالله ساندويتشات جبنة، طبق سلطة- علبة عصير صغيرة , اي حاجة اي حاجة للفقراء وهيكتروا في الشوارع للأسف ويتم وضع لافتة بوجود طعام ،

9- التجار اللي "يعرفوا ربنا" لأن غالبيتهم للأسف هتتعمل لهم نار خصوصي بسبب الافترا والجشع وغش الأسعار وطبعا من أمن العقوبة اساء الادب ، التجار اللي بيتاجروا مع الناس يبتدوا يتاجروا مع ربنا هيكسبوا اكتر "اعمل لنفسك ورد يومي" تقدم من بضاعتك لأسرة محتاجة، ايا كان اللي بتبيعه يا تقدم منه يا تقدم "ريعه" لحد فقير

ده مؤقتا بعض اللي قدرت اجمعه من دماغي ومن كذا جروب والبقية تأتي وربنا يتولانا برحمته

دينا عاصم