ربنا سبحانه وتعالى في محكم كتابه وكل الكتب السماوية، حكى لنا عن كل البلاوي والفواحش، حكى لنا عن الفاسد والمفسد والفرق بينهم وعن الجشع اللي عاوز ياخد الدنيا كلها وفاكرها بشطارته، .
وحكى عن الاخ اللي قتل اخوه عشان واحدة ست، وحكى لنا مشهد القتل بتفاصيله بمشاعر القتيل وحالة الندم بتاعت القاتل،، كله كله حتى الطريقة اللي تخلص بها القاتل من الجثة!
وحكى لنا كمان عن الزوجة اللي خانت زوجها وحاولت تغري راجل تاني، بل وصف لنا مشهد الغواية بشكل تفصيلي معجز،
كل هذا بمنتهى اللطف الإلهي والحكمة الربانية، والتناول المهول اللي كان طبيعي لا يخدش حياء بل يبعث على التفكر والاتعاظ.
اذن محاولة تصوير المجتمع على انه خالي من العيوب محاولة بائسة ومضحكة وتخالف الناموس الكوني اللي ربنا سبحانه وتعالى وضعه.
وانا ست بتشوف الفن جزء من عظمة ربنا، لأننا من خلاله بنخلق اشخاص وحكايات ترتفع بالناس وتدعوهم للتأمل والعظة وتخليهم يتمتعوا بالجمال ويتذوقوه.
الفنان ربنا وهبه جزء من قدرته على الخلق والابداع
وطول عمر مصر بالفن بتتكلم عن الفاسد والمنحرف بالكوميديا والتراجيديا.
وبتجيب الخيانة بكل انواعها، لكن التناول نفسه كان عظيما والفن كان له دور محترم في تقويم المجتمع و(تقييمه).
هناك فارق بين تصدير المساوىء بغرض نشرها و(تطبيعها) ف حياتنا ويجبرنا نحبها ونتقبلها كأن ده العادي زي فيلم ( أصحاب ولا) بتاع نتفلبكس
وبين تناولها بشكل فني راقي تقيل كما كانت مصر وفنها زمان.
افلامنا ومسلسلاتنا تناولت كل أشكال الأخطاء البشرية والانحراف بانواعه،
لكن الفرق كان في الهدف، واقرب عمل هو (لام شمسية)
خد عندك.كمان فيلم عمارة يعقوببان، جاب الحرامي والشاذ المنحرف والست اللي مش كويسة، لكن حلل ووضح وكرهنا ف الغلط وشوفنا نتايجه، هو ده الفن.
لذا،
انا ضد تحجيم الإبداع ووضع محاور وخطوط للإبداع الفني، لأنه سيكون بلا طعم، لكن الأولى يكون فيه فلترة للأعمال اللي بتقدم،
يعني لو محمد رمضان مثلا طلع عمل لنا مسلسل ضعيف لكن بيتكلم عن الفضيلة وابوه متقتلش و ابنه متخطفش، ولا عيط من عين واحدة ، هل كده فيه افادة للناس؟
ولو جيبنا مرات اي مخرج ولا حبيبة اي منتج وعملت لنا مسلسل عن أركان الإسلام الخمسة او فضائل الرهبنة الناس هتعيش في سلام كالملائكة؟
ده تجريف للفن، ومصادرة على الفكرة بدلا من تصحيح مساره،
انا عكس معظم الناس،
انا شايفة مستقبل حلو فيه شباب جديدة بيمثلوا هايلين، وشايفة مبدعين اقلامهم الماظ، وشايفة ناس كتير جداااااااا يستحقوا نتبناهم، وهيقدموا لنا الشهد وف كل المجالات خصوصا التمثيل والادب والشعر والغناء، الفنون عموما وهيقدروا يقوموا بالرسالة اللي فقدت دورها ف المدرسة ودور العبادة بسبب التلقين
ف بدل ما نحط محاور تبوظ الدنيا، احتضنوا المواهب الجديدة وغيروا الدماء الفاسدة ف المجالات دي بدماء جديدة نقية، وسيبوا القرف، هيتلاشى لوحده
(فأما الزبد فيذهب جفاء وأما ما ينفع الناس فيمكث في الارض) صدق ربي العظيم
مصر مليااااانة عباقرة،
ولا حول ولا قوة الا بالله
2
-2
