إنت دين قائم بذاته.. للمسيحي واللي أسلم 

واللي كفرتيه فحياته

اللي لابس بدلة تلمع واللي لابس جلابية

وخلق ياما عرايا باتوا

آه يا قادرة انت شعبك حالة نادرة

شعب مليان بالتنوع ..فوق وتحت وبين بينين

المهندس والمدرس 

والنوابغ فنانين

فيكي عالم فيكي حالم فيكي شلة دجالين

واللي ما بيفك خطك 

أو بيحسن كلمتين

مصر يخرب بيت شيطانك ياللي عاشقينك عبادة

وسط عز الحزن شعبك يطلق النكتة بسعادة 

مصر بهدلتي فحبايبك بس عاشقينك يا قادرة 

مهما شافوا من جلايبك اصل حبك حالة نادرة

مصر كل الدنيا كومة ..وانت شعبك كوم لوحده

ياما عدّى عليه نوايب لو تفوت على مين تهده

بس نعمل إيه فغرامك ياللي عاشقينك عبادة

اللي لابس جلابية..

 واللي لابس لك بيادة

مصر يخرب بيت شيطانك

وسط عز الحزن شعبك ينفجر ينبوع سعادة

ياللا روحي...دانت روحي

 ياللي طلعتي لي روحي...ياللي موتيني فيكي

باتولد لك..ميت ولادة