الصديق العزيز جدا فتحي المزين باعت لي عتاب طيب جدا
بيقول لي ان كلامي في مجموعة بوستات عن بعض الكتب بتخبط في دور النشر الفلانية والناس زعلانين وبيكتبوا ردود، واني كلامي بيكسر فرحة الناس وكذا
فتحي المزين خاطره على راسي
بس أنا يا فتحي لا كتبت عن ناشر ولا عن كاتب نهائيا
لما حد يكتب عن موضوع عام، من الطبيعي ان كونه عام معناها ان في ناس كتير متضمنة فيه
لو حد مسه الكلام، هل الخطأ عندي؟
مثال لذلك، آخر بوست عن أول كتاب بالذكاء الصناعي، ده كان بعد ما صادفني منشور إنجليزي عن كتاب إنجليزي، فضحكت، يعني مش عندنا بس اللي مش بيكلفوا خاطرهم يبحثوا عن الأمر قبل نسبه لأنفسهم.
صدقا ما خدتش بالي لو هذا الكتاب الإنجليزي من منشورات مين، هو كان من الإعلانات الممولة بتاعة الفيس
يا ريت يا كل الناس.. لو عايزة أقول حاجة لشخص بعينه هاقول له في عينه.. أمتلك الجرأة لذلك
أما الشكوى من أن حد بيتكلم.. في أي مشهد عام..
عيب
لستم آلهة ينبغي عليّ السجود والتسليم لما تفعلون
ولا حتى مركزة مين بيعمل ايه
بتصادفني قضية عامة عادي جدا أني أتكلم فيها زي ما غيري كتير بيتكلموا فيها
اللي عايز إيمان الدواخلي تخرس لمجرد أن هو عايز يعمل حاجة مش عاجباها.. طيب ولما تخرس كده بقى اللي انت بتعمله حلو؟.. أو هتروح لغيرها تخرسه وغيره تخرسه وغيرهم تخرسهم؟
يا أهل الثقافة والكتب ربنا بيُنتقد على الفيس، إنما أفعال.. لا وأفعال مجردة وأفكار مش أشخاص نهائي الأفكار والأفعال والصورة العامة ماينفعش حد يبدي رأيه فيها؟، من أعجب العجب أنها تطلع منكم!
أنا عندي فكرتين حلوين اختاروا واحدة تريحكم
أقفل الأكونت خالص
أو تيجو تكتبوا مكاني اللي على مزاجكم
اختاروا.. واللي تختاروه انتم حرين في اختياره، يخصكم ما يخصنيش
انت حد جميل يا فتحي وخاطرك غالي.. وانا موافقة على كلامك، بس بشرط.. أنا أكتب على مزاجهم، وهم ينشروا على مزاجي.. ينفع؟
ليه تأليه الذات وافتراض أنكم الوحيدين في الكون؟
ليه تأليه الذات وافتراض أن الآخر لازم يمشي على مزاجكم بدون تفكير ان ده مش منطبق بالعكس وعادي انتم ماشين بفكركم مش على مزاجه؟
الاختلاف بديهة إنسانية
أنا وهالة البشبيشي مابنتفقش على حاجة في الحياة نهائيا وبيننا محبة بوسع الكون
فتحي المزين اختلافي معاه لو بينكم وبين حد هتقاطعوا بعض، لكن على العكس من أعز الناس
اهدوا وفتحوا مخكم للاختلاف
ضحكتوني ع الصبح
ولكنه ضحك كالبكا
2
-2
