العلاقات و مزنقة المعرض

في أحد أيام المعرض، ضجرت بالشباب المنادين مع كل أربع أو خمس خطوات 

حضرتك مش عايزة كتاب تطوير نفسك

حضرتك مش محتاجة كتابة لمساعدتك على نجاح العلاقات

كلنا يا فندم محتاجين نعرف ازاي نعامل.........

وصلت أني رديت على أحدهم لأ أنا عجزت واقتربت من الموت وهاخلص من كل العلاقات

هو حد متخيل بجد أنه هيتعلم العلاقات وينجح فيها بكتاب؟!

هو ممكن الاستفادة والاسترشاد طبعا

بس العلاقات تعليمها بيكون بالعلاقات.. التجربة والممارسة وفهم الآخرين

اللي غرقان في أنه يستاهل كذا وأهم حاجة أنا ودور على اللي يحبك بدون شروط.. يعني لامؤاخذة جردل تتقيأ فيه ومايعترضش

ده ولا كتب المعرض ومعارض الدول المجاورة هتنفعه

انزل يا بني انت وهو الشوارع واتعاملوا واتصاحبوا وحبوا.. افشلوا واتخدعوا وأحبطوا واتهدوا.. وقوموا واتعلموا تختاروا صح وافشلوا تاني

الكلمة العظيمة تعيش وتاخد غيرها

ويعيش المعلم ويتعلم

إنما تقلبوا المعرض مزنقة كيف تعيش.. يبقى هتتحولوا روبوتات ليس لها تمايز ولا لحياتها مذاق وهتغرقوا في الوحدة ووهم عشق مراياتكم اللي لم ولن تفي لكم مع تقدم العمر