احنا ولاد البحر
اتربينا على أسطح كباين ستانلي
لعبنا المنديل وكهرباء وثبت صنم
وسهرنا مع الكوتشينة والدومنو ولعبة الأفلام
شلنا الشنطة اللي فيها الكاسيت والشرايط
اتخدلت ايدينا من الكولمن المليان تلج والترمس اللي فيه الشاي بالنعناع
فرحنا بأصوات الكوبايات في الشنطة
شلنا علب المكرونة والكفتة والبانيه
نزلنا نزلة ستانلي اللي بنشوف منها البحر من اول الشارع
نطينا من المنط واتنقعنا في الحوض الصغير ننقي الريتسا
ونفتحها بالسكينة ونغرقها ليمون ونتمزمز
احنا اللي لعبنا كورة في المية مع ناس نعرفها ومنعرفهاش
دلقنا بعض في المية وصرخنا خوف وفرحة
ركبنا البدال وبعدنا عن الشط وشاورنا لماما كأنها شيفانا من بعيد
احنا اللي سمعنا نجاة وام كلثوم على صوت البحر واحنا نظاف ومسرحين بعد الدش وجسمنا وعنينا احمروا واسودوا من جمال الشمس
شوفنا اهالينا بتروح وتيجي والكابينة مفتوحة للكل زي البيت الكبير
احنا اللي كلنا الفريسكا وخطفنا من بعض غزل البنات
وختمنا برشة جريئة من الآيس كريم
احنا اللي لما كنا بننام بعد يوم البحر
نلاقي السرير بيتهز بينا زي الموج
وننام ونصحى مبسوطين
احنا اللي صيفنا بجد
واتبسطنا بجد
وعملنا ذكريات حلوة متتنسيش
احنا الاسكندرانية
#رجعت_أيام_الصيفية
#ستوب_كادر
2
-2
