القطة العامية

بتحس بريحة الشر الجاي عليها

تلاقيها بتجري

ساعات منه

وكتير تشتاق للحرية

فبتجري عليه

في الطب النفسي

سموها العقدة

في المزيكا

سموها ايقاع

أنا 

سميتها حلاوة روح

روح ورا روح

بتروح

عارفة أنها تقدر لسة

بتمرمغ فرو جسدها الناعم

على برد الأسفلت

تدَّفى بجريان الدم اللي بيتحرك ف عروقها

وتأدي العرض بخفة

يستعجب منها الناس

القطة العامية

بتحب عماها

كل ما تسمع

(الله)

أرواحها الستة

بتلف الدنيا

بتشوف بعينين الشر اللي بيجري عليها

وتسلم روحها السابعة

لآخر ضوء للعربيات

بعد صراخها

بخطوة