يوم في صالة الرسم "مع سكشن تصميم "

يوم في صالة الرسم "مع سكشن تصميم "



لما تكون طالب واثق من نفسك أكيد انت طالب مجتهد واكيد الحل التصميمي المعتمد على كونسبت قوي تبقي انت اكيد نجحت فى حل المشكلة التصميمية لمشروع مستشفي دعونى اشرح لكم
طبعا مشروع زي مشروع المستشفي ده فيه من الصعوبة ما فيه
المفروض ندخل فى حل حركة المرضي داخل المستشفي وحركة الموظفين للادارة وحل حركة الدكاترة بدون ان تتقاطع هذه الخطوط الثلاثة للحركة
ومن جهة اخري هناك جزء معقم وجزء غير معقم وارتباطهم معا ومن ناحية اخري حل حركة المخلفات بدون تلويث الجزء المعقم
ومن ناحية اخري ايضا هيئة المستشفي نفسها وشكلها الخارجى الذي لابد ان يكون مميز

اه طبعا دخلنا فى دوامة
احنا دلوقت فى انتظار المعيد ينادي الغياب
طبعا السكشن ده قعدت فى اول الصف عشان لما يمر الدكتور بيبتدي من اول الصف ده عشان الفكرة بتاعتي لازم تتراجع ولانى واثقة انها هتعجبه قعدت هنا فى انتظاره
دخل المعيد ونادي على غياب 40 طالب
وبعد نص ساعة كاملة
دخل الدكتور
ساد صمت طبعا
ووقف الدكتور حائرا يبتدي منين المرة دي
وبصوت مرتفع سال انا ابتديت منين المرة الى فاتت
من هنا يا دكتور
طيب يبقي هبدا من هنا المرة دي عشان اشوف باقي الطلبة
اخ دا ابتدي عكس ما توقعنا
ودخل الدكتور التاني وابتدي من ورا بردة بس فى الصف المقابل
والمعيدين من حسن حظي عدي واحد منهم علي واليكم الحوار الذي دار بيننا
- وريني الفكرة يا بشمهندسة واشرحيها لى
- اتفضل انا قمت بوضع فكرة مبنية على كونسبت قوي
- كونسبت !!!!!!!!!!!!!!!!!
- ايوة
- وايه هو الكونسبت القوي ده
- المستشفي بتعتمد على خطوط حركة واضحة وغير متقاطعه
- مين الى فهمك كده
- ؟؟؟؟؟
- يا بشمهندسة انت تحطي فكرة اولا للكتلة وبعدين تبقي تحطي التصميم
- امممممممممممم
- السكشن الى جاي لازم اشوف الى قلتلك عليه
وطبعا انا مش عارفة اقول أي حاجة دا معناه انى اغير الفكرة الى سهرت عليها للصبح
مش مهم احاول المهم ان فى حد ناقش معايا المشروع
بعد ربع ساعه الدكتور الاول قام وصرخ فينا كل يجي هنا
ووقف صامتا حتي تجمنا وصرخ فينا
- المرة الى جاية سيمنار عشان كل الى جاني النهاردة بفكرة عقيمة يصلحها زي ما شرحت ( دا معناه اننا نسال الطلبة الى هو راجع معاهم )
يلا كل واحد على لوحته
وخرج الدكتور ووراه الدكتور التاني وتركونا مع المعيدين نتناقش معاه عما قاله ولم نصل الى شيء انتهي السكشن وكلنا حائرين لا ندري ماذا نفعل





سكشن جديد في التصميم

جلست فى نفس المكان السابق مش عارفة بقي انا وحظي لما اشوف مين بقي الى يحن علينا المرة دي
وعلى غير توقعي
جانا المعيد التاني
- فين فكرتك يا بشمهندسة
- اتفضل
- ايه ده
- انا قمت بوضع فكرة للكتلة الخارجية ثم حاولت ان احل التصميم الداخخلى على اساسها
- ايه ده ايه الغباء ده
- أأأأأأأأ
- اذاي يا بشمهندسة تعملى كده دي مستشفي لازم يبقي الحل الداخلى الاول مبني على كونسبت قوي وبعدين فين خطوط الحركة مش واضحة
- امممممم
- انا عاوز اشوف المرة الى جاية الحل زي ما شرحتلك كده
- اوك
وقعت فى حيرة كبيرة
اعمل ايه



وفى يوم اخر داخل صالة الرسم
المرة دي معايا الحل الى يرضي المعيد
دخل الدكتور الاول ومنن حسن حظي عدي على
- اشرحي يا بشمهندسة فكرتك
- انا عملت خطوط حركة واضحة وغير متقاطعه وووووووو
- ايه ده يا بشمهندسة الكتلة هتبقي سيئة
- انا اقترحت فكرة للكتلة وبعدين المعيد
- معيد معيد ايه يا بشمهندسة فين رايك انت مش واثقة فى فكرتك أي حد ييقولك حاجة يخليكي تغيري فكرتك
- لا
- يا بشمهندسة اعملى كتلة مع الحل ده يعني كويس يجيي منه بس حطي كده كام دايرة مع مستطيل عشان يبقي في شكل قوي للكتلة

روحت زي كل مرة وغيرت الى قال عليه الدكتور
وفى السكشن التالى


الدكتور التاني
- وريني يا بنتي
- اتفضل
- ايه ده دواير ايه دي انت عايزة تتعبي المرضي
انت هتموتيهم حد يعمل دايرة فى المستشفي
- ما انا
- انت لسه هتتكلمى انا مش عاوز اشوف دواير خالص ايه ده
- حاضر

رجعت حيرانه ومش عارفة اسمع كلام مين فيهم احترت اصدق مين واحترت اكدب مين
واخيرا وصلت الى فكرة جهنمية
فى السكشن الى وراه
كان فى تكثيف فظيع
عدي علي الدكاترة الاتنين والمعيدين الاتنين
وكل ما يعدي حد اطلع له اسكتشات للحل الى يرضيه
عملت اربع حلول مختلفة لكل واحد من الدكاترة والمعيدين وطبعا سمعت كلمات الاعجاب والرضا من الك
حل رائع
انت ممتازة
دا حل جميل
دا كونسبت قوي فكرة ممتازة
انا دلوقت فى قمة السعاده والرضا
ممتازة انا ممتازة

فى اخر السكشن
الدكتور واقفا فى بداية الصالة
يا جماعة السكشن الى جاي تسليم الفكرة المبدئية للتصميم كل واحد يحاول يوصل لاحسن حاجة عملها من غير فينشنج والتسليم ده عليه درجة كبيرة من اعمال السنة اعتقد اننا عدينا عليكم كلكم وراجعنا معاكم كلكم

نزل على الخبر كالصاعقة
انا دلوقت معايا 4 حلول ممتازة بس يا تري
هقدم انهو حل فى التسليم الى جاي



الى لقاء جديد في يوم من الايام الحلوة فى حياة طالب عمارة