كان نفسي

بلدي حبيبتي حقك عليّ كان نفسي أعملك حاجات كتير لكني لم استطع
كان نفسي آخد بإيدك وأداويلك جراحك سامعاكِ يا حبيبتي بتئني وبتبكي من الألم وايدك مدودة لأولادك بتقولي ساعدوني أقوم وضمدوا جراحي لأجل ما أعود تاني أضلل عليكم وفروعي تحضنكم وتستركم وتأويكم .. دا أنا فرحت بيكم لما مهانش عليكم تشوفوني وهما بيغتصبوني ومديتوا إيديكم بلمسة حانية قوية ورفعتم عني الظلم وقلت ولادي أخيرا حسوا بيا .. وانتظرتكم تشدوني علشان أقوم وأقف وزرعي يفرع .. لكن لقيتكم بتدوسوا على توبي وإنتم بتوقفوني فاتكعبل تاني وأقع
خايفة عليكي يا بلدي ييجي يوم وتقعي وتنكسري وأشوفك بتموتي ولا ألاقي ساعتها حضن يضمني ويأويني
سامحيني يا حبيبتي علشان مقدرتش أقف في وش اللي عايزين يدمروكي .. مقدرتش أصرخ بعلو الصوت وأقول حرام عليكم أمي وإنشاالله حتى تدوسني رجليهم ويموتوني وأروي ترابك بدمي .. مش خسارة فيكي ما أنتِ ياما مسحتِ دمعي في عز ما كنتِ بتئني
سامحيني يا بلدي ياروح قلبي علشان مش قادرة أشيل التراب اللي عفروا بيه وشك وأبعد عنك اللي بيطعنك في ضهرك
أنا كنت فرحت لما بعدوا عنك الخاينين وقلت هقعد أنا وأنتِ نغني عل شط نيلك غنوة الحب اللي كنت شايلهالك في قلبي .. وماكنتش قادرة أسمعهالك لما كانوا باعدينك عني
ولما رجعتِ تاني أتنفس من صرك الحرية ولسه أنا وإنتِ هنغني داسوكي برجليهم وعلي صوت الصراخ ورجعتِ تاني مش قادرة تسمعيني
نفسي أضمك لصدري وأدوايكي ودمي يسري فيكي
نفسي أشيلك فوق راسي وأسند رجليكي بإكتافي
في قلبي تلات رسايل
أول رسالة للشعب المصري .. عايزين نهدى شوية ونبطل صراخ علشان نسمع بعض والأهم نسمع بلدنا ونشوفها عايزه إيه مننا ونرجعلها ضحكتها تاني إزاي
--------
ثاني رسالة لوزير الداخلية .. شاكرين جهودك لإستعادة الأمن لمصر ولكن إزاي تعتمد ملايين علشان توفر مستشفى خمس نجوم للدمر بلدنا ولما نقول مثلا ارفعوا الدين عن الفلاح تقولوا منقدرش دي فلوس ناس مش فلوسنا .. طيب وهي الملايين دي فلوس بسلامته ولا فلوس الناس
---------
الثالثة للمجلس العسكري .. إنني أرى من وجهة نظري مع احترامي لكل الآراء أنكم ساتر كبير مانع عننا طمع الطامعين من الخارج وفي نفس الوقت مانعين التفكك الداخلي ولكن لماذا المساندة الغير المبررة للرئيس السابق ولما التأجيل الغير مبرر للقصاص من الطاغية .. أنا لاأقول اسجنوه أو إعدموه ولكن فقط عالجوه في مستشفيات الحكومة ويشوف الناس وهي بتتعامل معاملة ال...
على الأقل يتعرف على اللي كانوا رعيته ويشوفهم كانوا عايشين إزاي يمكن يندم ويستغفر قبل ما يلقى رب العالمين ويسأله عنهم .. يعني .. أهو يكون إتعرف ةعلى شوية من رعيته اللي هيتسأل عنهم ميبقاش واقف زي ا؟لأطرش في الزفة مش عارف دول مين ولا من أي كوكب

اللهم ارحم بلدي يا أرحم الراحمين