حزين عليكي يا بلدي .. وأنا يادوب كنت هتعلم أحبك وتحبيني .. أيوه كنت لسه هتعلم .. صحيح انك أمي والمفروض حبك يتولد في قلبي يوم ولادتي .. لكن أعمل ايه حكامك ماسابونيش أحبك .. لما سرقوا مني اللقمة والهدمة ومن قبلهم سرقوا كرامتي .. أحبك ازاي وأنا عايش من غير كرامة ومش لاقي آكل .. أحبك إزاي وأنا مش لاقي وقت للحب وأنا بأجري ورا لقمة العيش المتغمزة بالإهانة ولما قامت الثورة لقيت حبك بيكبر قلبي .. والفرحة ملت روحي لما اتنسمت نسيم الحرية والكرامة .. وحزنت أوي لما اتكشف لي كل النهب والسلب اللي فيكي .. حسيت ساعتها أد ايه أنا كنت متهان وكنت مظلوم .. ومش عايز أرجع تاني أتهان وأتظلم ..
مرسي ولا شفيق .. شفيق ولا مرسي .. أنا زي ما أنت شايفة مواطن بسيط كل اللي بأطلبة أعيش بكرامة وأنام الليل وأنا وعيالي شبعانين ومش خايفين لاييجي بكرة ما نلاقيش فيه اللقمة .. قالوا شفيق هيرجعنا تاني للعهد الأولاني .. وقالوا مرسي هيعمل فينا ويعمل .. وأنا بين الأتنين تايه .. ما أنا قلتلك أنا مواطن بسيط على أدي وأحلامي كمان بسيطة وعلى أدها .. أنا مايهمنيش مين اللي يكون رئيس .. كل اللي يهمني يا حبيبتي ما يخلونيش أكرهك من تاني .. أصل أنا جربت طعم حبك في قلبي .. لقيته جميل أوي .. وعايزه يفضل علطول جوايا بيجري في دمي .. بحبك يا بلدي وحزين عليكي وعليا ليسرقوكي مني تاني .. أنا مش طالب كتير يا حبيبتي ما انتي عارفاني طلباتي بسيطة وحلمي أبسط .. طلبي هو إن ما يجيش رئيس يسرق اللقمة من فمي وفم ولادي .. عايز أعيش في حضنك بكرامة .. عايز أعيش مش متهان .. عايز ما يجيش يوم ماألاقيش الرغيف آكله وغيرك بيتنعم بحقي .. واحياتك عندي يا أمي حافظيلي على كرامتي .. حافظيلي على حبك في قلبي .. انت عارفاني ؟؟ أنا المواطن المصري اللي اسمي من اسمك وقلبي بينبض في جوفك .. اوعي تنسيني يا غالية .. علشان أنا بحبك ... بحبك ... بحبك يا بلدي
إمضاء
المواطن مصري
المواطن مصري
2
-2
