بسم الله الرحمن الرحيم



م ..... ص ...... ر ........................... مصر
مصر ... مصر ... آخيرا عرفت انطق اسمك ...يادوب لسه بأنقشه في قلبي .. يادوب لسه باتعلم احبك .. ما انا إتسرق مني حبك وإتسرقتي مني كلك وانا إتسرقت منك .. وبما إني مصري غلبان طالع على الحسرة وقلة الحيلة والظلم عصرني عصر .. اتعودت أصبر أبني نفسي تاني واعتبرت اني لسه مولود يوم 25 يناير .. يعني دلوقت عمري ثلاث سنين ونص .. امال ليه لسه باتعلم انطق إسمك لسه باعرف يعني إيه وطن .. لكن ايد غليظة قاسية سدت فمي وقالتلي .. بس إخرس .. ما انت طول عمرك اخرس هتتكلم وتقرفنا ليه .. إخرس ...... سالت ليه يا ناس مش عايزيني أنطق إسم أمي ليه ... قالولي : انت لا ليك ام ولا غيره إنت هنا غريب وهتفضل طول عمرك غريب ... قلت : يا ناس يا عالم أنا كنت لسه بأكلمها وتكلمني .. لسه لمسة إيدها وهي بتطبطب عل ظهري لسه حاسسها .. لسه صدري دافي من حضنها .. انا كنت بأحلم ... قالوا بصوت أقسى من أي مرة .. ايوه كنت بتحلم وفوق باه من أحلامك وأعرف حجمك وأرجع منكانك تاني تحت الأرض تدوسك الرجلين هو دا مكانك .... طيب إزاي ادوق طعم الحرية وترجعوني تاني ما كنتم سبتوني ملفوف في خرقتي المهلهلة اتعودت عليا واتعودت عليها حتى لسعات البرد اللي بتدخلي من بين خرومها عارفه وعارفني .. وكرامتي اللي من كتر دوس الرجلين ماتت من قبل ما تتولد سبتوها تنبت ليه علشان أتحسر عليها ما انا كنت عارف إني أرض بور عقيم مش بتطرح الا الصريم .. وجسمي اللي اتعود الضرب لغاية ما اتنحت فيه كالنقوش الفرعوني .. دوقتوه ليه طعم الطبطبة .. خلتوني ليه ارقص على السلم لاأنا عارف ارجع اتحمل تاني .. ولا عارف اعيش .. لكن إنت يا مصري يا غلبان بتكلم مين .. مفيش غير رب العالمين هو اللي عالم بحالي وغني عن سؤالي ... يارب طوب عمري عايش يتيم لا لي وطن ولا ام وبعد ما دوقت الحنية وعرفت يعني ايه ام سرقوها مني تاني يارب بلدي .. يارب امي .. ارحمني يارب انت الرحمن الرحيم ارحمني علشان الناس ما بتعرفش الرحمة