يوميات واحد ‫#‏مسيحي‬ فـ رمضان .. طويــــله بس جميـــله

زمان وانا صغير كنت بستنى شهر رمضان
زى اى حد من اصحابى المسلمين عشان حاجات كتيره اووووي
منها انى اخرج من المدرسه بدرى
وانى اتفرج عـ بكار
وانى اروح الدرس الاقى الاستاذ صايم ويلغى الدرس ونعد بعدها نفرقع بمب وصواريخ فـ الشارع
وانى استنى بالليل برنامج حوار صريح وبدون مونتاج ومواقف ومواقف ومواقف عمرى مانسيتها زي
انى اصحى بدرى عشان افطر قبل ما اروح المدرسه عشان اصحابى كلهم صايمين
ومينفعش اكل قدامهم عشان مفيش فرق بينا
لما نلعب طول الفسح واعطش فـ الاخر
واروح اغسل وشى عشان اعرف اشرب من غير ما حد يشوفنى
ومع ان المدرسه كلها بتبقى عارفة انى بشرب ومع ذلك محدش بيزعل منى لان مفيش فرق بينا
لما نخرج بدرى من المدرسه وحد يسألنى خرجتوا بدرى ليه
اقول ببراءه عشان صايمين مع انى مش مسلم اصلا .. عشان مفيش فرق بينا ..
لما اسهر طول الليل عشان اسمع المسحراتى قبل ما انام .. عشان مفيش فرق بينا ..
لما بابا يفاجأنى ويجيب لى فانوس ويقولى دا فانوس رمضان عـ فكره الفانوس يبقى بيقول الاذان .. وكنت برضه بفرح بيه .. عشان مفيش فرق بينا
لما نتمرمرط طلوع ونزول السلم عشان جيرانا يبعتوا لنا طبق مليان قطايف
ساعة الفطار مع اننا مش صايمين اصلا وماما ترد عليهم تانى يوم بطبق مليان كنافة
وهكذا طول الشهر"عشان مفيش فرق بينا"
يعنى لما اكون مسيحى واستنى اسمع اذان المغرب بفارغ الصبر
عشان بيجى بعديه بكار"عشان مفيش فرق بينا"
وعشان المصريين طيبيين وعشان مفيش فرق بنا انا بقول كل سنه واحنا طيبيين ورمضان كريم

ياااااارب نرجع واحد ومفيش حاجه تفرقنا :):)