عندي صديقة كل ما اقولها على أي حاجه تقولي مش هصدق الا اما اشوف بعيني 🤷‍♀️

يوم الخميس اجازة .. مش هصدق الا اما يجي يوم الخميس والاقي نفسي في بيتي وصاحية براحتي..

بيقولو هتمطر النهاردة... مش هصدق غير وانا شايفة المطرة بتنزل فوق دماغي 

وهكذا كل ما اقولها حاجه ترد عليا شبه الردود دي الي هو لازم يكون الحاجه ملموسة قدامي غير كده مش هتصدق.

لا اخفيكم سرا انا كنت بستغرب يعني مش للدرجة دي بس مع الوقت والصدمات اكتشفت انها صح ايوه يا جماعة في التوقيت الحالي لازم نشوف ونسمع بعنينا ونشوف افعال حقيقية مع كل الي حولينا عشان نصدق اوقات دماغنا بترسملنا سنياريوهات مش حقيقية او يمكن حقيقية بدون دليل يمكن المواقف الي فوق دي مواقف بسيطة وصغيرة لكن لو اتعاملنا بنفس الطريقة مع كل المواقف الي بتقابلنا هنرتاح ....

فلان قالك انه صاحبك وحبيبك متصدقش غير اما تشوفه ف فرحك وشدتك ... فلان اتكلم على حد تاني انه كويس متصدقش الا اما تتعامل معاه ... فلان بيشكر في نفسه وانه احسن واحد على الكوكب متصدقش غير اما تتعامل معاه ...