ظل الشخصية

طيب 

أعتقد مفيش مناسبة أفضل من كده هقدر بيها أتكلم عن الظل و الناس تفهمه 

الظل بتاع اي شخصية 

Shadow self 

و هو ببساطة ان الصفة اللي انت شايفها بتتجلى في شخص ما بشدة افهم انه محتاج يمارس عكسها ضروري 

فيا بيعمل ده بشكل واعي 

يا ده هيحصل منه بشكل غير واعي

نوضح أكتر 

لو انت إنسان فيك الخير يبقى ضروري فيك الشر 

يا انت واعي بما فيه الكفاية بشخصيتك فبتوظف الشر بتاعك صح سواء للدفاع عن الناس أو لرد حق او للحفاظ على نفسك 

يا انت مش واعي و الشر اللي في شخصيتك سايقك و انت ماشي تقول " مشكلتي اني طيب " و اني مبعرفش أكون شرير … الخ 

حلو ؟ 

طيب نوضح تاني 

لو انت انسان سادي يبقى ضروري فيك المازوخية 

لو انت واعي هتبقى بتمارس دي مع ناس و دي مع ناس تانية 

لو انت غير واع، هتمارس حاجة واحدة بس منهم بشراهة و التانية هتطلع ع الناس بدون أدنى تحكم منك فيها و هتفضل مش فاهم الناس دي بتعاملك كده ليه ! 

—————

معلش هو الموضوع سخيف شوية بس مهم جداً

ليه مهم ؟ 

لأن أي انسان متشافي عمل حاجة إسمها 

Shadow work 

اتصالح فيه مع الجانب المظلم من شخصيته 

Dark side of your soul

و اتعلم ازاي يقدمه للناس بشكل واعي 

فميحصلش ان يكون عندك الخير المطلق ولا الشر المطلق 

ولا يكون عندك نقيضي الصفة عموماً 

فتصبح متوازن

———————

اللي بقوله ده هيفيدك في اكتر من حاجة 

١- انك تبطل تعلق شماعة مشاكلك ع الناس من حواليك 

٢- انك تتعرف على نفسك بشكل واعي فتختارلها الأصلح بدل ما تختارلها حد يطلع أسوأ ما فيها 

٣- انك تكون فاهم انت بتعمل ايه ليه … و فلان اللي ظاهرلك منه جانب واحد، الجانب الخفي منه عامل ازاي و تتأكد الجانب ده بيطلع مع مين و بيطلع اصلاً وللا هو مكبوت و هيطلع على غفلة

٤- انك تتعلم تقبل الجانبين في شخصية أي حد عشان متكبتوش و تتعلم تحب الناس بدون شروط عشان يحصل التشافي 

٥- انك تكون واعي تعمل حدودك مع الشخص ده في ايه بالظبط و امتى تهرب و امتى تهجم … الخ