طموحي قاتل
- ازاي يعني ؟
= يعني عايزة أنجح أوي
- ما تنجحي
= لأ عايزة أنجح جامد
- ما الدنيا مليانة ناس ناجحة ايه اللي فيها !
= انا عايزة أكون أنجح منهم كلهم
- طب نعرف الأول ايه تعريفك للنجاح و بعدين نحكم انتي انجح منهم وللا لأ
يعني لو قولنا النجاح فلوس … فكل حد عنده فلوس في اللي عنده أكتر منه
و لو قولنا النجاح شهرة فكل حد مشهور في الأشهر منه
و لو قولنا النجاح تحقيق و أرقام فكل حد باع حاجة في اللي باع أكتر منه
اذاً في ناس كتير في الحياة دي ناجحين و تعريفات النجاح مفيش أكتر منها
عارفة ايه بقى اللي قاتل بصحيح ؟
= ايه ؟
- أولاً انك متكونيش عارفة تعريفك انتي الخاص بالنجاح
ثانياً انك متكونيش قادرة تستطعمي الفرحة بأي حاجة وصلتلها
ثالثاً انك تدوري ع النجاح في عيون الناس من حواليكي مش جواكي
رابعاً انك تأذي و توجعي و تضغطي الناس بإسم النجاح
يعني الرحلة أهم من الوصول عشان في وقت معين بتكتشفي ان مفيش وصول اصلاً و ان انتي مجرد عايشة يا بتعمري يا بتخربي و مع كل قرار و كل خطوة و كل نفس بتتنفسيه انتي بتعملي حاجة من الاتنين دول
فالقصة كلها في الرحلة و عشان تستمتعي بالرحلة ضروري تتقللي و تعيشي الحياة ببطء فتقدري اللحظات البسيطة
= بس انا من مدرسة more is more
- المدرسة دي حلوة أوي مادياً لكنها فاشلة على مستوى الحياة الشخصية و العلاقات و الروحانية و احنا كائن بيحتاج توازن
= ليه فاشلة ؟
- عشان بتعمل ناس مش شايفة بعض، ناس شايفة أهدافها المادية في الحياة و بس
= و ايه المشكلة ؟
- المشكلة ان أهدافك دي لو مادية بشكل بحت مفيهاش روحانية خالص هتأذي الناس و تستخدميهم لخدمة مصالحك الشخصية و فل على كده، بينما اللي هيتعارض مع مصالحك الشخصية هتدوسي عليه و تكملي
بينما لو أهدافك روحانية فبقى ليها هدف أسمى، و مبقتش مصالحك شخصية و لكنها بتخدم كل من له علاقة بيكي من قريب او من بعيد فالڤاليو اتضاعفت كتير جداً
و ده ال more is more في العلاقات
هو اني أكون بخدم المجتمع مش بخدم نفسي على أفا المجتمع
هو اني أكون بقدم شئ ميموتش بمجرد موتي
و للعلم انا أعرف ناس شحاتة و طموحها قاتل بردو
الجرابيع طموحهم قاتل
و قتالين القتلا طموحهم قاتل بس ده بحق و حقيقي 😅
الناس دي عشرتهم بتوجع القلب و الروح و الجسم و العقل
وجودهم بيزعزع استقرارك النفسي و بيضغطك جداً لأنه طول الوقت دماغه شغالة عليك و بيفكر ازاي يستخدمك و يستغلك عشان يزداد نجاح
و اوقات بيفكرلك بدالك و بيقولك تعمل ايه و متعملش ايه في حياتك عشان تفضل علاقتكوا مستمرة
و اوقات بيخترعلك حجات عشان ينهي بيها علاقته بيك لأنه شايف انك فاشل و مش على مستوى طموحه
و طول للوقت بيتعامل معاك على انك مبتعملش كفاية
و عارفة مين الأسوأ من ابو طموح ده ؟
= مين؟
- اللي عنده طموح و مبيبذلش بربع جنيه مجهود عشان يحققه بردو 😅
مهو ده كمان هيعيشك في نفس الأجواء بس كنوع من الاعتمادية لأنه لو بيحقق مش هيسيب نفسه و يقعد يحكم عليك انت !
عارفة مين اللي محقق ذاته يا هادية ؟
= مين ؟
- بابي يا حبيبتي 🙂 راجل رايق عارف الطريق و الطريقة و شاري الناس في حياته مش دايس عليهم، حاسس بيكوا و بيحبكوا و يفديكوا بعنيه
عارفة ليه انتي مش واخداه نموذج و مهدية سرك زيه ؟
= ليه ؟
- عشان مش بتحترميه … و عندك حق بصراحة
= أحترمه ازاي ؟
- لأ للأسف دي مش شغلانتك، الاحترام يؤخذ لا يمنح
فحاولى تبصيله بعين البنت الناضجة و تشوفيه الراجل الكبير اللي عمل كل اللي يقدر عليه
= انا ليه مهزوزة ؟
- عشان باباكي وراكي من شخصيته الضعف و بس … موراكيش القوة فانتي مش واثقة ان في حد في ضهرك غير الفلوس
لكن صدقيني مع كل تدخل بيحاول يتدخله في حياتك و برغم ان الموضوع تشوفيه من بره سخيف … لكن هو عنده قوة شخصية كبيرة جداً بيحميكي بيها من بعيد
حتى لو فشل في التعبير عنها قصادك لأنك بنته اللي بيحبها و ضعيف قصاد حبها
لكنها موجودة …. حاولي تثقي فيه.
2
-2
