زمان لما كان حد ميعرفش يستقبل مني الحجات الحلوة
كنت بتعصب أوي و أحكم عليه
على أساس ازاي يا غبي انت متدركش اني بحبك كل الحب ده !
ازاي يا متخلف انت مش حاسس بإهتمامي بيك و تقديري ليك !
انت ازاااااااي اديك مشاعر رومانسية ترد عليا بكلام عقلاني !
ازااااااي اديك احترام ترد عليا بلا مبالاة !
—————
مع كل موقف من دول كنت بحس ان اللي قدامي ميستاهلش اللي بقدمه بس كنت بعمل حركة ذكية جداً
و هي اني بستمر في تقديمه مش طيبة ولا غلب أد ما بكون شايفة ان دي أرض صالحة أكمل استثماري فيها و مش ضروري المردود دلوقتي طالما متأكدة ان هيتمر بعدين
و العكس صحيح !
لما كنت بشوف أرض بور مكنتش بتعب في الزراعة… كنت بسحب عطائى بشياكة و أوقات أسيب العلاقة نفسها عادي
( كلامي ينطبق على كل أنواع العلاقات مش شرط العاطفية بس )
و لما أدركت ان جزء من الغلط كان من عندي
لأن العطاء اللي بتقدمه و تتبعه بأحكام بيكون مسموم و مش صحي و مليان إيجو
اتعلمت مقدمش عطاء في العموم غير و انا فعلاً مش فارقلي المردود و سواء كانت الارض صالحة وللا بور
أقدم اللي عايزة أقدمه بكيفي و بمزاجي و عشان انا عايزة ده مش أكتر.
———————
يا بتقدم بحب و بقمة ضعفك العاطفي و متزعلش من الطريقة اللي بيتم استقبال بيها عطائك
يا تدي أد ما وصلك … و دي العلاقة الأكثر صحية
يا تسحب عطائك تماماً
—————-
و لو أنثى خليكي في الأوبشن الأخير عادي مبتفرقش
كده كده العطاء سمة الرجال " لو العلاقة عاطفية "
و كده كده من ترك ملك " لو العلاقة صحاب او شغل او غيره "
2
-2
