رأيي في محتوى سوزي

هقول رأيي في محتوى سوزي و ان شاء الله أقدر أتكلم عن كل اللي في دماغي و أوصله بشكل صحيح 

١- تحكم على سوزي لو هي إنسانة مشهورة و عارفة أصول الظهور للعامة مش في أول ظهورها ولا في أول ترينداتها خالص 

لأن تقديم المحتوى شغلانة زيه زي أي شغلانة بيحتاج تدريب و صواب و خطأ … زي ما بتعمل في أي شركة و مديرك بيصبر و يستر عليك 

و في الجانب ده البنت بتتطور و في فيديوهاتها الأخيرة بقت تقول الكلام و تعدله و تقول عشان محدش يقول علينا " كذا " ما معناه انها بتتعلم … البنت مش قافلة دماغها عن الصح بالعكس 

٢- مريم و خليني أقول مريم عشان نبصلها بعين الطفلة اللي ليها بيت و أهل و ناس مسنودة عليهم و مسنودين عليها …. 

مريم بتقدم نموذج للبنت اللي بتكبر قدام عنينا كلنا بتظهر لخبطة مشاعرها و احتياجاتها و ال ups and downs بتاعتها قدام بنات جيلها و ده بيديهم نوع من الدعم ان مش لوحدهم اللي بيعانوا من اللخبطة دي و لذلك ليها شعبية كبيرة جداً عند 

A class 

بنات حياتهم العاطفية ملطشة زيهم زيها و عندهم تفكك أسري من اللي قلبك يحبه

٣- البنت بتطلع تتعامل مع اختها من ذوي القدرات الخاصة اونلاين ! اللي عيال كتير من عيالنا مش فاهمين الكونسبت في حد ذاته من الأساس و مشافوش منهم ولا يفهموا ازاي يتعاملوا معاهم … لو كانت بنت وحشة كانت الشهرة خليتها تتكسف و غيرت من دواخلها … لكنها ع الثبات 

٤- البنت يوم ما ارتبطت و حبت قلبتها خطوبة و كانت مدخلة الولد بيتها و بيعامل اهلها مراحتش تصاحبه من وراهم ولا بتعمل حاجة من ورا أهلها و ده بردو شئ يحترم انها تعلمه لبنات جيلها  

٥- لو كانت الفلوس غيرت الأسرة دي كانت مامتها سابت شغلها و قعدت ! انما لآخر فيديو معاها مامتها فيه بتكلمها عن شغلها و الست مستمرة و بتتمنالها الخير يعني راضية عنها

لو كانت الفلوس غيرتها كانت سابت العيشة مع اهلها في العموم و شافت نفسها انما هي متدفية فيهم و ده بردو نموذج يحترم 

٦- من اصل الفيديوهات اللي فيها كلام عن باباها مفروض هو اللي يتم محاسبته سواء فيديو الجبنة او اللايف اللي اتمسك عليها مش هي 

٧- الحوارات دي كلها بتصب في مصلحتها لو لعبتها سوشيال ميديا و شهرة … القضايا بتعلي الريتش أصلاً و بتعمل تعاطف شعبي و مفيش انسان هيختلف او يتفق عليه الجميع فانت كده خدمتها خصوصاً و هي مش في دماغها تعليم 

٨- و لو ع الفلوس فالداعمين ليها ولا اكتر بس في خلال الشهر اللي فات ما شاء الله زادلها مليون متابع …. فانت بردو بتعلي سوقها 

٩- اقل حاجة تقدر تعملها هو انها تاخد بعضها و تطلع ع الامارات و الف من يتبناها هناك …..

في الآخر انت خدت حاجة من بيتها و عاقبتها عليها بس مخدتش كل حاجة ظهرت من بيتها و حكمت حكم يرضي ربنا.