شوية حجات تعرفها كده في قاموس العلاقات الناضجة
١- مبنتخلاش عن حد عشان خاطر حد و ده لإدراكنا ان مفيش حد هيقوم بدور حد
٢- علاقاتنا محدودة و عميقة فكلها مهمة
٣- مبنعملش بلوكات لمجرد دخولنا في علاقة عاطفية ! احنا مكناش ماشيين نحب في كل دكر وللا نتاية نعرفهم عشان ييجي حد يطلب مننا طلبات عيانة شبهه !
٤- الطرف التالت في العلاقة ما بيننا هو الحرية … أيوة ! انت دايماً في منافسة مع حريتنا المطلقة، أصل معلش ليه نتخلى عنها ! مفيش سبب مقنع خالص
٥- بما ان الطرف التالت حريتنا فضروري تحترمها و تفهم انها جزء لا يتجزأ من شخصيتنا، مش رفاهية ولا حاجة ملهاش لازمة ! لأ في الغالب انت مبتكونش ليك لازمة قصاد الحرية دي فحاول تقدم قيمة تستاهل نتخلى عنها و لو بشكل جزئي و ليكن مثلاً قعدتك تكون حلوة و رايقة
٦- الجواز مش غاية بالمرة ! و للأسف حتى مبقاش وسيلة عشان في الغالب حققنا كل اللي يلزمنا عادي … فهو مجرد لايف ستايل مختلف عن اللي عايشينه و لأن اللي عايشينه احنا مختارينه بكل تفاصيله و عاجبنا فحاول تحترم اختياراتنا السابقة و يا تعززها يا تحل عننا ببساطة
٧- انت ممكن تكون لسه شباب من جوه فعندك طاقة للمناهدة و الخناق و الجدال و الشد و الجذب … احنا لأ للأسف معندناش خالص فتلاقينا سكة و دوغري في كل حاجة لدرجة تخض بس بتنجز
٨- بعد لف كتير بالنسبالنا سينا من سونيا مش فارقة فمتحاولش تقنعنا بإختلافك الشديد و انك آخر قطعة، انت بالنسبالنا الحد اللي جآي ينافس على حريتنا مش اكتر و شوفنا منك كتير عموماً
٩- مفيش قلق من أي حد في حياتنا، لو كنا بننساق ورا حد كنا اتجوزنا من بدري … فمتعملش برم و انت اللي هتغير القاعدة ، كان غيرك أشطر
١٠- نفسنا ننبهر، بس للأسف مبيحصلش
١١- مفيش مغريات خالص، نفسنا يتم إغرائنا بس للأسف بردو مبيحصلش
١٢- شايفين جواك أكتر ما شايفين اللي بره و اللي بتحاول تصدرهولنا، فهتمثل هنمثل و هننهي العلاقة فوراً
١٣- مفيش راحة ولا بالراحة للأسف مع ان المنطقي كل ما ننضج العلاقات تكون أهدأ، بس ده في حالة المتجوزين من بدري بيكونوا دخلوا منطقة راحة كده بتخليهم مرتاحين و مربيين كرش زي بعض ضامنين بعض و مش على بالهم يكسبوا بعض تاني، عندنا الوضع شديد شوية كل يوم بنكسب بعض كأنها أول مرة و أول ديت يا صاحبي، ما انت لو معملتش كده هيبقى عمار يا حرية من الطرفين … محدش مضطر 😅
١٤- شكل و جسم و مظهر، الكل حلو لأنهم خلاص فهموا حجات كتير و اشتغلوا على نفسهم كويس … فبتحتاج ڤاليو أعمق بقى عشان تقضي وقت مع الانسان ده و ليكن دماغ حلوة، قلب نضيف، آداء سالك، قعدة رايقة، حب… أي حاجة
انما شكل خارجي … بلاش عشان شوفنا ياما
١٥- تكوين العلاقات بيآخد وقت طوييييييييل عشان نثق في بعض ولا نسلم لبعض وللا نفتح قلبنا لبعض، نقطة مش حلوة بصراحة بس آهي حقيقة و ده لأننا بنشوف ان العلاقات استثمار و يا أرض بور يا أرض حلوة و هتطرح … منقدرش نحكم قبل ما نزرع.
2
-2
