نفسي الساذجة صورتلي كتير جداً ان الحياة دي مفيهاش ناس فاسدة و ان كل انسان فيه الخير و فيه الشر
فا ليه مبصش ع الحلو اللي جواه و أركز عليه بدل ما آخد بالي من الوحش اللي فيه و أهرب منه
و إكتشفت ان الفرق بين بني آدم صالح و غيره فاسد هو عامل الوقت
يعني بالفعل كلنا عندنا الخير و الشر
وَنَفْسٍ وَمَا سَوَّاهَا فَأَلْهَمَهَا فُجُورَهَا وَتَقْوَاهَا قَدْ أَفْلَحَ مَن زكَّاهَا وَقَدْ خَابَ مَن دَسَّاهَا
انت بقى هتقضي وقتك في تزكيتها وللا هتفضل تدسها لآخر العمر ؟
و إجابة السؤال ده تخصك تماماً
بينما أنا من حقي متعاملش غير مع نسختك الكويسة
فلو انت مصر إصرار تام انك تستمر في دس نفسك …. من حقي تماماً أطفش منك
و بكده أكون نجوت بنفسي
= حتى لو انا من جوايا انسان كويس ؟
كلنا كويسين يا صاحبي بس الحياة اختيارات … و انت اختيارك تعيش بأسوأ نسخة منك
يعني ممكن تكون كويس بس إمعة
ممكن تكون كويس بس شخصيتك ضعيفة
ممكن تكون كويس بس
People pleaser
و غيره من الصفات اللي بالنسبة لغيري بيئة خصبة للإستفادة منك و لكنها تكرهني انا في عشرتك و معرفتك
ففي الحالة دي غيري أولى بيك أكيد و انت أولى بنفسك ♥️
نيتك يحاسبك عليها ربنا … انا ليا باللي بتتعامل معايا بيه
= حتى لو صبرتي عليا و اتغيرت ؟
في الوقت اللي هصبر عليك فيه هيكون فيا انا بردو حجات إتغيرت للأسوأ بسبب معرفتك و من هنا جت فكرة أن النبي صلى الله عليه وسلم قال: المرء على دين خليله فلينظر أحدكم من يخالل.
الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ {الزخرف:67}.
ده غير اننا متفقين ان كل الفرق بين صالح و فاسد هو عامل الوقت
فمينفعش نضيعه على بعض، لكن ممكن نقضيه و احنا بنزكي نفسنا سوا سوا
2
-2
