خلينا نفند نصايح صلاح و نقول اللي لينا و اللي علينا 

————

في العشرينات .. 

 شغل ١٦ ساعة عالاقل .. فكك من جو الوورك لايف بالانس ده .. العشرينات هي قمة صحتك و عطائك افرم نفسك

= طيب انا هفرم نفسي حاضر بس في سبيل ايه ؟ تحقيق الوورك لايف بالانس قدام يعني وللا في سبيل اني أموت بجلطات و أعمل أبيوز لصحتي دي ؟ وللا في سبيل الفلوس و بس ؟ 

 احترم طبقتك و بلاش تقول كلام طبقة غيرك .. عشان تقدر تخرج منها و توصل للطبقة اللي فوقك .. فا بلاش تقول حجج و أعذار ناس مرفهة انت مش منهم (توكسيك وورك انفيرومنت .. بوسيتيف ڤايبس .. كوربورت سلييڤ) طالما ابوك مش مليونير يبقى ركز في شغلك و بس

= طيب هركز في شغلي و بس حتى لو مش بحبه و حتى لو في بيئة سامة و حتى لو مبيزودنيش على أي مستوى غير المستوى المادي … كل ده بردو عشان أهرب من طبقتي ؟ طب تقصد الطبقة الاجتماعية وللا الطبقة المادية ؟

أصل الصنايعية بيكسبوا أكتر من الموظفين  

 بلاش مشاريع في الاول .. و بلاش جري ورا تايتلز مش حقيقة ال CEO مش نهاية العالم

 = لما هو بلاش جري ورا التايتلز قاتل نفسك في الشغل عند الناس ليه ! متعمر في مالك !! بتشتغل ١٦ ساعة عند الناس ! ده ساعتين زمن تعمل اللي بتكسبه في الشهر كله و انت بتشتغل لحسابك ! 

  ما تتجوزش بدري .. الجواز بدري عادة بيعطل .. و دايما بيحطك في حالة صراع من اجل البقاء .. و بيقبل قدرتك على المجازفة

= الجواز بدري من أكتر الحجات اللي بتعينك و بتشجعك ع الشغل عشان وراك لحم ، و لكن ده في حالة انك قابلت حب حياتك و عايز تكمل معاها العمر كله … لو كده كده هتتجوز جواز تقليدي … أجل لحد ما يبقى معاك فلوس عشان تختار كواليتي  

 اقفل الانستجرام بتاعك لمصلحتك

= لو يقصد عشان احساسك بالنقص فهو صح، لو يقصد عشان السوفت بورن فهو صح، لو يقصد عشان متضيعش وقت، فهو صح 

⭕️ الانجليزي بتاعك لازم يكون احسن من العربي 

= الانجليزي مهم لأنه لغة البيزنس في العالم كله و لكن أي حد دارس لغة بيفهم ان لغته الأم ضرورة لإتقان اللغة التانية بس مش موضوعنا، في دي كلامه صح بردو  

 لو عايش في الاقاليم اشتغل سنتين تلاتة بالكتير في الاقاليم و بعدها سيبها و روح القاهرة .. 

= انا مع انك متضيعش حتى السنتين تلاتة دول 😅

 الشات جي بي تي .. بقى زي القراءة و الكتابة، مش اوبشن انك ما تعرفش تشتغل بيه و عليه

= لو انت موظف هيفيدك، لو صاحب عمل هتحسه أداة متخلفة نوعاً ما 

 لو ها تطلع الخليج لازم قبلها تشتغل لك سنتين تلاتة في القاهرة .. القاهرة مفرمة و مدرسة اللي يسلك فيها يسلك في اي حتة في العالم

= ملهاش علاقة، شغل الخليج أنضف و أبسط من القاهرة مش محتاج تتفرم ولا حاجة 

 اياك و التحويش او الإدخار او الاستثمار في السن ده .. في اي حاجة غير كورسات عملية تطبيقية 

= الكورسات من أكتر الحجات اللي بتضيع فيها وقت و فلوس … كل حاجة موجودة اونلاين 

 بلاش MBA .. ركز في الكورسات اللي مدتها شهر فا اقل .. و يكون اللي بيدي الكورس ممارس للشيئ بايده .. ال MBA لو مش مطلوبة عشان ترقية محددة يبقى ما تضيعش وقتك فيها في العشرينات

= ولا دي ولا دول … كلها سبوبة

 احضر ايفنتات كتير .. و اسمع فيها قليل .. بلاش حماس و بلاش تصدق كل اللي بيتقال .. انت رايح من احل التغذية السمعية و البصرية و العقلية 

= احضرها عشان توسع الnetwork مش عشان اي حاجة تانية 

 في المعادلة بتاعة مرتب ولا خبرة .. دايما اختار الشغل اللي هيديك خبرة أعلى

= طبعاً اختار المرتب، الخبرة ده شغل هواة  … بخبرتك بتروح شركة تانية تاخد خبرة مختلفة تماماً و كأنك يابوزيد ما غازيت

 مرواحك الجيم مش رفاهية .. ده اهم من الاكل و الشرب .. راس مالك هو صحتك و صفاء ذهنك

= صحة ايه بقى ده انت عدمتنا العافية ! هو في جسم هيرتاح و انت نفسيتك خرة ؟ ! 

قلل اصحاب .. زود معارف .. نصيحة تقيلة بس صدقني اكتر ناس هتعطلك في الفترة دي هما اصحابك.

= في ده هو صح ١٠٠٪؜ 

 تقبل ان العشرينات اتعملت عشان تلوش فيها .. مفيش حد في العشرينات بيبقى عارف هو عايز ايه 

= و دي بردو 

 جرب كتير .. افشل كتير .. جازف براحتك .. تلاقي التلاتينات رايقة

= التلاتينات رايقة عشان قطعت بطاقتك مش عشان مرتاح مادياً 😂

 ما تسمعش من اي حد ما وصلش للي انت عايز توصل له .. فلتر الكلام

= خصوصاً لو انا عشان أكيد مش عايزة أوصل للى صلوحة فيه ده

الحقيقة انا سرحانة في اللي قاله صلاح و حزينة ع الشباب اللي عايز يعمل فلوس فبيضيع العمر موظف !