عن المحتوى الذي اقدمه

✅ بحط صورتي مع كل بوست مزاج و كيف … لو بيضايقك الموضوع ده متقعدليش سهلة 

✅ تخصصي علم نفس فبتكلم في كل حاجة في الحياة دي related 

بالنفس البشرية متحجمنيش و تقولي اتكلم في ايه و متلكمش في ايه … اعمل ده مع نفسك عادي

✅ بتكلم عن الرجالة و عن الستات فمتدخلش تقولي بتتكلمي عن الرجالة ليه، معندناش قسم حريمي و رجالي في التخصص معلش انت مش داخل fitting room 

✅ هو ينفع المطلقة تنصح - اه هي الأحق بالنصيحة أصلاً لأنها مرت بالتجربة الكاملة … محدش هينفع يكلمك عن فوايد السفر و هو لسه في الطيارة ميعرفش هيوصل وللا لأ. 

✅ متطبقش الأمثلة على نفسك و تناقشني فيها او تعترض عليها لأن انا لا أعرفك ولا أعرف حاجة عنك عشان اقولك الكلام ده ينطبق عليك وللا لأ …. إنت أدرى بحالك 

✅ تطوير المحتوى بتاعي بيكون طبقاً لأقدم متابع ليا مش طبقاً لوعي المتابع الجديد ! يعني لو انت في وعي مختلف عن اللي وصلناله سوا مش هينفع اعيدلك من الأول و الا هفضل اقول كلمتين و اعيد و ازيد فيهم عمري كله زي الشريط السافف مش هنخلص، فلو انت مش فاهمني ولا فاهم حاجة عني ثقف نفسك قبل ما تدخل تلوش 

✅ محتوايا مستفز جداً لتفكيرك و موروثاتك و نفسك و عاداتك و تقاليدك و هيضايقك ع الاقل مرة و في الغالب هيضايقك كتير … عايز تخوض الرحلة اتفضل تنور، لو بتتقمص اقعد بعيد.  

✅ انا ست بحب نفسي جداً و معنديش مشاكل مع أنوثتي و بحب أعبر عنها برواقة … فلو الآداء ده بيستفزك او بيحرك جواك ساكن خليك بعيد 

✅ بحب الكلام الحلو و الفليرتينج و بستقبل من المتابعين كل الحجات الحلوة … فانا ممكن أعدي الشتيمة فيا عشان جديد هنا لكن مش بعديها لو شتمت متابع قديم بحبه و بيحبني. 

✅ بعمل مشاكل و بحفل ع الكومنتات و بضايق اللي بيضايقني و ردود فعلي بتكون بشكل مفاجئ و غير منظم … عشان لو طلعت مسرح في أي وقت و لأي سبب متتخضش

✅ بحب اللعبة الحلوة ف لو عجبني كلام و عندي تعقيب عليه بنزله بردو و بتكلم

✅ عندك استشارة تقدر تسيبهالي في الانبوكس برد عليك بسكرين شوت في بوست، هي استشارة واحدة بس اللي مجانية، عايز زيادة بتحجز سيشن و تفاصيل الحجز ببعتهالك انبوكس 

✅ متكلمنيش في الدين و متناقشنيش بالدين ما لم أكن انا نفسي بتكلم باللغة دي في البوست، انما انا هنا جهة نفسية مش جهة دينية و هتلاقيني بفتح في المواضيع الجنسية و الاغراء و حجات هترعبك سيكا او هترعبك جامد …فإمشي لو مش لازمك النوع ده من المواضيع

✅ انا عارفة ان الجواز مؤسسة مقدسة وانتوا بتدخلوها لأسباب مادية او دينية، بس انا بشوفها مؤسسة رايقة مفروض يتم دخولها لأسباب مزاجية مليئة بالروقان و الأجواء الرومانسية … لو شايفها نظرة مش واقعية أنصحك تعيش الواقع بتاعك و تفكك من هنا 

كفاية كده دلوقتي.