حد بيسألنى انتى ايه هدفك ؟
فهأحكى لما بيجيلى
Client
بالخطوات كده بنعمل ايه
أولاً : انا مبأحضرش لأى سيشن ولا بأدى لحد أفكار حتى يتكلم فى ايه ..... بأسكت خالص و بأسمع منه
الخطوة دى بتكون لطيفة لأن الانسان بطبعة بيحتاج يتكلم فى أكتر حجات ملخبطاه حقيقى و عايز يوصل لحلول فيها
ثانياً : بأكد كتير جداً انى مبأوفرش حلول ولا بأعالج ... احنا بنرفع الوعى بالذات سوا و ده بيتم عن طريق ترتيب الأفكار اللى اتقالت فى الخطوة اللى قبل دى و منطقتها بالبحث العلمى و جمع المعلومات.
ثالثاً : فى النقطة دى بيكون اتحدد موضوع السيشن ... بمعنى بنكون عرفنا ايه من المنيماليزم هيكون مناسب نشتغل بيه
سواء كان
١- معرفة القيم
٢- وضع الحدود
٣- ديكلاترينج أماكن و أفكار
٤- صنع القرارات
و غيره و غيره
و كل حاجة من دول فى ليها اختبارات و طرق بحث و افكار تتقال حواليها
رابعاً : بنراجع السيشن بكل اللى اتقال فيها و بنوصل لخطة عمل
سواء
١- جدول روتين يومى
٢- خطوات عملية للخروج من أزمة ما
٣- الثبات و عدم وضع شئ جديد فى اللايف ستايل بتاعك
٤- اضافة تعديل أو تغيير على حاجة بسيطة بنعملها
و غيره و غيره
و غالباً النقطة الأخيرة دى بيعملها الكلاينت بنفسه بعد نا فهم منيماليزم و بعد ما التفاصيل اترتبت و وضحت قدامه.
--------------------
اللى فات ده السيشن بتمشى ازاى
أنا بقى هدفى ايه ؟؟؟
كل اللى فات ده بيعمل تغيرات جذرية فى حياة الناس ... فبيتحرروا من قيود كانت بتشدهم لورا و بيتخلصوا من كراكيب كانت زاحمة حياتهم و بيتقبلوا الحياة بتفاصيلها و بيستمتعوا بيها أكتر بكتير ....
زى مثلاً :
واحدة نفسها تغير المطبخ بتاعها فوق ال ٧ سنين .... بعد السيشن وفرت الفلوس بسهولة و غيرت المطبخ و عشان اتعلمت منيماليزم و طبقت لوحدها بعد كده فغيرت اوضة نومها و جابت ليفنج جديد كمان
مثال تانى :
واحدة كل شوية تخرج من بيتها غضبانة جداً و تروح عند أهلها بس كل مرة لسبب تافه ... فكانت بترجع و الكل بيكون مغلطها هى ...
بعد السيشن حصل معاها هى و زوجها مشكلة كبيرة جداً و خرجت من بيتها تانى لكن المرة دى لسبب كبير و هى انها بتتضرب ! و مكانتش قايلة لأى حد الموضوع ده ...
لما رتبت حياتها الأسباب المنطقية لمحاولاتها الهروب ظهرت تماماً و بقت منطقية و الكل واقف جنبها و محدش يقدر يقولها ترجعله
مثال تالت :
واحد كان فى علاقة عاطفية لمدة طويلة جداً جداً و خلال السيشن اكتشف ان تمسكه بالعلاقة دى كان لأن والده رحمة الله عليه شافها و ارتباطه العاطفى بالفكرة دى هو اللى أخره فى الخروج من علاقة سامة كده !
مثال كمان :
واحدة نفسها تسافر بس لوحدها من غير أولادها و كان الاحساس بالذنب مقيدها بشكل غير طبيعى ... و زيها واحدة نفسها تروح چيم و كل مرة تبدى الأولاد على نفسها
احساس الحرية اللى بيحسوه لما يتخلصوا من العبء المادى عليهم و يتحرروا من عبودية الكراكيب بيخلى فى مساحة ووقت لكل حاجة تتعمل ....
------------------
ده هدفى
هدفى الناس تتحرر .... هدفى محدش يتقولب ولا يسمح لحد يقولبه
هدفى ان كل حد يكون زى ما هو تماماً بكل تفاصيله الانسانية بكل قراراته العشوائية اللى اخدها زمان و غلط
هدفى الانسان يتقبل نفسه و يحبها جداً و يتعلم يعمل ده ازاى بكافة الطرق
2
-2
