مسؤولياتك و وضعك الاجتماعي

وضعك الاجتماعي ملوش دعوة بحجم المسؤولية اللي انت شايلها 

يعني مش عشان انتي أم فشرط تكوني شايلة أكتر من بنت 

" في بنات إمهاتهم متوفيين و بيشتغلوا و بيجهزوا اخواتهم و بيقوموا بدور انثى كامل جوا البيت " 

ولا عشان انت راجل شرط تكون شايل أكتر من أي ست 

" في ستات بتتعب في شغل البيت أكتر من راجل ماسك لابتوب و قاعد لي ستاربكس ممكن يجيب ربح عالي جداً في وقت قليل " 

ولا عشان سينجل تبقى مسؤولياتك أقل من واحد متجوز 

" في واحد سينجل فاتح شركة و مشغل ناس و شايل أهله الكبار في البيت " 

ولا عشان الصغير تبقى شايل أقل م الكبير 

" اوقات الكبير بيكون عاش مع أب و أم و الصغير مبيلحقش بيكون حد منهم اتوفي و هو اضطر يشيل مكانه " 

ولا شرط عشان مطلقة تبقى شقيانة عن المتجوزة 

" في ستات بتختار تتطلق عشان حجم المسؤولية يخف من عليها فتعرف تعيش بعد ما كانت شايلة البيت جوا و بره " 

ولا شرط عشان عندك عيال كتير تبقى بتتعبي أكتر م اللي عندها عيلين 

" في ناس مخلفة عيال كتير دورهم فعال في البيت و ايدهم بإيد بعض و في واحدة تخلف عيل وللا اتنين يعتمدوا اعتماد كلي عليها " 

الخ الخ الخ الخ 

نوع المسؤولية مفهوم و حجم المسؤولية معروف …. لكن طريقة شيلك للمسؤولية دي ليك انت فيها كامل التحكم و الاختيار

المهم انك تشيلها و انت مبسوط و جسمك مرتاح و قادر ….