هل انت عايز فعلاً الحاجة اللي بتتمناها ؟
كنت دايماً لما اقعد مع حد و يفضل يحلم و يتمنى بتخنق منه
آه و الله
عشان بحس انه ممل جداً !
ما أي حد في الدنيا حقق الحلم بتاعك ده تقدر ببساطة تعمل زيه
أمال مصدعني و عمال تعيد و تزيد فيه كأنه مستحيل ليه ؟
لحد ما في مرة سألت واحدة منهم قولتلها ما تحققيه !
قالتلي لأ ده حلم بس … الواحد دايماً يحب يحلم
قولتلها و ليه موقفاه عند المرحلة دي يعني ما تسعي و تحققيه
بدأت تتعامل معايا كأني من كوكب تاني او اني بستهتر بالطرح بتاعها مش اني بشجعها أو فعلاً عايزالها الخير
و مع الوقت بدأت ألاحظ ان اللي زيها ناس كتير جداً
ناس شايفه ان أحلامها مينفعش تطلع بره زوون انها مجرد حلم و تعددت الأسباب بقى
زي مثلاً ان حد شايف ان الوصول هيكلفه حجات هو مش أد انه يبذلها
و حد مثلاً ميقدرش يآخد ريسكات فالأسهل انه يتخلى عن الحلم
و حد مثلاً شايف ان عظمة الحلم في انه يفضل حلم
و هنا ييجي السؤال
هل انت فعلاً عايز الحاجة اللي بتحلم بيها و تتمناها دي ؟
——————-
في كل مرة اتأخرت في تحقيق هدف ما … بكتشف إني من جوايا مش عايزه أحققه
طب ليه مش عايزة ؟
و أبدأ أوجه أسئلة لنفسي و ترد عليا و ناخد و ندي و بنوصل للآخر لحاجة من اتنين
يا نتخلص من الأمنية و الحلم دول لأنهم مش مناسبين لأي حاجة احنا عايزينها في الحياة دي
يا نحل مشاكلنا النفسية و العوائق الفكرية اللي مصعبة علينا الوصول للحلم أو الأمنية دول
و ده لسبب بسيط
ان أوقات الحلم و الأمنية بيكون في حد ذاته كراكيب و بيديك رسالة عن نفسك توحي بالعجز !
في حين انك قادر تماماً تحقق و لكنك مجرد
" مش عايز "
ببساطة
2
-2
