ليه بحب الرجالة الكبار ٤٠ فيما فوق
كنت قعدة انا و صاحبتي قعدة لطيفة دخل علينا مجموعة من الشباب بنات وولاد
فبقولها البنات شيك أوي مش لايقة ع الولاد اللي معاهم دول
و بدأنا نحكي في ان ليه بشوف الرجالة الكبار سيكسي و ليه قلما شاب صغير يلفت نظري و هل دي دادي ايشوز يعني وللا ايه ظروفي !
اقولكوا ليه بقى ♥️
الراجل عند سن ال٤٠ بيكون عدى على حجات كتير في الحياة و بتكون داست عليه نوعاً ما بعكس شباب ال ٢٠ اللي فاكر انه جامد اوي و قادر ع التحدي و المواجهة و بتاع
في سن ال ٤٠ بيكون الراجل نمى عنده مهارات الاستماع و اتطور في مهارات التحليل بعكس الصغير اللي حاسس انه جامد جداً و لازم يعبر عن نفسه و اسمعووووووني يا كماحة انا جامد جداً
في سن ال ٤٠ غصب عنه بيدور ع الكواليتي لأنه جرب الكوانتيتي و مش حاسس بحاجة بعكس الصغير اللي بيلمع في عيونه كل حاجة في الدنيا و حاسس ان الوقت ضيق اوي هيجرب ايه وللا ايه يا عيني !
في سن ال ٤٠ بيكون عمل فلوس كويسة او مشي شوية حلوين في الكاريير بتاعه ففهم الفولة نوعاً ما فمبيكونش بيحزق جامد على الحياة العملية زي الشاب الصغير اللي ماشي ياخد كورسات في اي حاجة و كل حاجة و حاسس انه لسه مبيعرفش يطير محتاج يطور من نفسه و بتاع
في سن ال ٤٠ بيكون طهقان زهقان متضايق … بس قلبه أبيض و طيب
عكس في السن الصغير اللي حاسس ان يلاااااااااععععع و راشق في أي حوار و طلعة و معندوش احساس بنفسه اساساً لما هيحس بغيره !
——————-
مبقولش ان حد أحسن من حد و سبحان الله طبيعي ان السن الصغير لازم يكون مايل أكتر للمادية عشان بيأسس لحياته لسه
غير الاربعيني اللي هدي شوية و بدأ يدور ع المعنى أكتر
2
-2
