( انا مش هشيل لحمه و هو مشالش لحمي )

فالست اتربت واتجوزت راجل تاني بالفعل و سابت البنت للجد و الجدة يربوها و خلفت هي ٣ عيال من الراجل الجديد ده

و كانت بتحكيلي انها بتجهز بنتها

= ليه هي أد ايه ؟

- في تالته اعدادي

= !!! و انتي متعلمتيش حاجة من تجربتك تعلميهالها ؟

- ياما قولتلها تركز في الدراسة و انا معاها لحد طب لأن الجواز كده كده جآي بس مش وقته …. لحد ما علقت مع خطيبها ده و هي في تانية اعدادي … الواد بردو كويس و الاتفاق حلو بصراحة يعني جايبلها دهب ب ٧٠ الف ايام ما كان الدهب ب ٢٩٠٠ و جايبلها ….. و…. و فضلت تعدد في الارقام اللي جايبهالها

انما ابوها عشان كنا ميسرين عليه فمحسش بقيمة الجوازة استسهل و هجرنا عادي

= ليه هو الواد أد ايه ؟

- مخلص دبلوم

= أمال مين مجهزله كل الكلام ده ؟

- أبوه

= و انتي عليكي ايه في الجهاز ؟

- مش أقل من ٢٠٠ الف

= طيب خير المهم انتي مبسوطة مع جوزك ده دلوقتي و بيساعدك يعني في جهازها و الصرف و كده

- لأ ! …. لعلمك محدش بيستحمل حد بردو يعني لما كنت اشتغل عشان اصرف ع البنت دي كان يلزمني اصرف ع ال٣ اللي منه كمان زي ما بصرف عليها ! و البنت مكانتش بترتاح لما تيجي تزورني ولا كانت بتقعد براحتها و بيني و بينك قولت كده كويس عشان تشم نفسها بقى .. اصل جوزي شايف نفسه بردو و واخد باله من نفسه و كده فيتقلق منه .. استنى اوريكي صورته

= لا خلاص تمام كده

—————————

قعدت مع نفسي شوية كده أفكر هو انا نفسي في ايه لبنتي و متوقعة منها ايه في حياتها ؟

لأن مش منطقي ازقها على حاجة و انا بعمل عكسها

او اتمنالها حاجة انا متمناهاش لنفسي

او انصحها بحاجة و انا مش عايشاها

أصل العيال بتتربى بالقدوة …. مش بالقوالة

———

دايماً وجهة نظري كانت ان الجواز مش صح يبقى خطوة للخلاص من مشاكل او وضع مش مريح او إستسهال

لكن أصول ييجي من موضع حب و وعي و رغبة في الحياة الجديدة دي بكل تفاصيلها

مع ان لو جيت للحق محدش واع بيتجوز بردو

هو قرار بيتآخد و انت قافل دماغك و مغمض عينك و فاتح قلبك بس

——

نيجي بقى للأسئلة المهمة

هل ده قرار يخصنا بما ان اللي بيدفع احنا وللا ده قرار ميخصناش ؟

و لو ده قرار يخصهم لوحدهم صحيح .. مش أصول يكونوا أده ؟! يعني يجيبوا فلوسه و يبدأوا بالراحة !

وللا هما اللي بيفرضوا علينا القرار ده بإسم الحب ؟ و ندفع فيهم فلوس و بعدها نلاقي المشروع بتاعهم بيخسر وللا البيت متلصم و نعيش في قيل و قال بكلام كله من نوعية جيبنا و مجيبتوش! و أمي و أمك عشان من الأول جوزنا اتنين عيال لبعض ؟

من الآخر

البيت اللي اتبنى بفلوس الأهالي وللا البيت اللي اتبني بفلوس الراجل ؟