الشخص المادي مش اللي بيحب الفلوس .. الشخص المادي مبيؤمنش بأي حاجة مش عارف يشوفها و يلمسها و مبيصدقش أي حاجة حتى لو حاسسها 

فطول ما انت بتتعامل معاه لو مدفعتش فلوس تبقى مبتحبوش

في الآخر هو مش عايز الفلوس عشان بيغتني من وراك… ده في الغالب هو اللي بيكع أساساً 

كل الفكرة ان معندوش مقياس تاني يتأكد بيه من أي حاجة 

فعادي هتلاقيه يدخل في معارك متخلفة مع الراجل في البنزينة ان إزااااي يديني الفلوس ناقصة جنيه أكيد كان قصده يغفلني 

- يا سيدي الراجل ميعرفكش أساساً عشان يغفلك هو بس بيجس نبضك لو عايز تسيبهومله وللا لأ 

= لأ هو عايز يغفلني لو مكانش عايز يغفلني كان اداهوملي و سابني أنا اديهومله 

- يغفلك في أرقام ؟؟؟ هو انت لو عديت الفلوس وراه ده شئ مستحيل يعني ؟ 

= خلاص يديهوملي الأول 

- ما تطلبهم منه ايه اللي فيها 

= و مش هبقشش عليه عشان الحركة الوحشة دي 

- انت حر يا سيدي 

= آه عشان انا محدش يغفلني و محدش يضحك عليا و محدش يلوي دراعي 

- دراع ايه بس ده راجل ولا يعرفك ولا في بينكوا معرفة شخصية ولا يلزمه أي حاجة م اللي بتقوله ده أساساً 

( بيعدي مترين ) 

و النبي يخويا تديني فلوس يا رب تتجوزها 

= خدي جنيه آهو 

الشحات : هو لسه في حد بيدي جنيه ! 

= طب خد ٥ جنيه

——————-

يعني بتاع البنزينة بيغفلك لكن ده مش بيبتزك عاطفياً و بيفاصل معاك كمان ؟ 

الشخص المادي نظرته للأمور محدودة و لا تتعدى الواقع الملموس 

فمبيعرفش يقيس مشاعره الحلوة ولا يقر بيها … بيعرف بس يحس المشاعر لما تحصل له خسارة فيتألم

عشان كده عشرته وحشة لأن مينفعوش غير شخص توكسيك يذل فيه و يستغله و يبتزه و يشغله سخرة و ياخد منه فلوس في مقابل كلمتين حلوين و تمثيلية زي الشحات ما عمل كده

———————

هل انا ضد اللي عمله مع راجل البنزينة ؟ لأ خالص انت حر تاخد فلوسك كاملة 

هل انا ضد اللي عمله مع الشحات ؟ لأ خالص انت حر تدي فلوسك للي عايز تديهاله 

يظل حكمك ع الأمور حكم عيان و قاصر و مش بتحس انك بتتحب حب حقيقي عشان انت قافل قلبك و مش عارف تتواصل مع روحك 

مش وحش على فكرة الف من يتمناك عادي ♥️