ازاي تملك إنسان يعشق حريته ؟
ان مقدار الحرية بحبك ليه يكون أعلى من العادي في حياته
= ازاي الكلام ده ؟ هو في حد لما بيتحب بيكون حر أكتر ؟ مش احنا بندخل العلاقات و نتناقر و كده عشان نسيطر على بعض
- آه فعلاً الناس الغشيمة بتعمل كده طول الوقت ! انت غشيم ؟
= لأ ! بس مش فاهم ازاي هأعلى من حرية الشخص اللي قدامي بحبي ليه ؟
- هتعلى من حريته بانك تلغي توقعاتك منه و متستناش منه حاجه و ميفرقش معاك لو هو مش حاسس انه عايز يتواصل.
= طب و دي تبقى علاقة ؟
- لأ
= أمال بقى ؟
- بص، مش انت ليك صحاب مشوفتوش بعض بقالكوا سنين مثلاً و لما بتشوفهم بترجعوا كأنكوا كنتوا مع بعض امبارح ؟
= آه
- آهو دول ناس انت حبك ليهم مليان حرية و غير مشروط باستمرار العلاقة بينهم، لكنك في قلبهم و بالهم طول الوقت لأن طلباتك منهم زيرو
= معقول أكون في بالهم طول الوقت اكتر م الناس اللي حواليهم ؟
- على حسب مدى تأثيرك في حياتهم، يعني في حد ميفارقش دماغي رغم عدم التواصل ما بيننا و في كد بتمنى مشوفهوش رغم كتر التواصل ما بيننا
فهي مش بنوع و كم التواصل انما بجودة المشاعر و قيمتها و قوة تأثيرها في حياتي
= اللي بتقوليه ده افلاطوني جداً
- مين قال ! في مرة كنت قاعدة جنب مامتي شوفتها بترد على تليفون بعد ما قفلت قالتلي ده فلان كان متقدملي من ٢٠ سنة بعد باباكي ما اتوفى
= سألتها ووضعه ايه ؟
- قالتلي متجوزش طول حياته
= قولتلها و ايه فكره بيكي ؟
- قالتلي سألنا على بعض مؤخراً
= قولتلها طب و ليه موافقتيش ؟
- قالتلي عشان كان عايزنا ننقل القاهرة و بيتنا و حالنا هنا فمحبيتش
——————-
عادي الدنيا بعدت ما بينهم ٢٠ سنة، أي حد يقول انهم نسيوا بعض
لكن محدش بينسى حد ولا بينسى أثره عليه و على حياته
اتأكد دايماً تكون طيب الأثر حتى لو اللي قدامك أنكر ده دلوقتي هيعرف قيمته بعدين
بننسى العلاقة لكن مبننساش المشاعر اللي حسيناها.
2
-2
