ازاى كل ما قل كثر و ازاى الجودة أحسن الكمية ...
حتى فى الرقص الشرقى !
١- كل ما زاد اللحم الباين قلل من جمال الرقصة و قربت أكتر للإغراء ... البدلة تغطى كله و اللى يبان يبقى بفعل الحركة و لينا في عباية فيفي عبده مثال آه مغطية كل حاجة لكن حركات الرقص بتظهر أكتر ما في أي بدلة تانية.
٢- زى أى حاجة حلوة لو عايزة تحترفيها ارقصى لنفسك ... مش لحد.
٣- محدش بيفتح رجله فى رقص شرقى الا لو صعيدى! ...
٤- وقفتك تبقى على صوابع رجلك الا لو غازية.
٥- كتر الترفيص شغل خيول مش رقص.
٦- كل لون رقصة و ليها بدلتها.
٧- فى حجات هتشوفى نفسك فيها و حجات لأ ... متعمليش حاجة مش حساها.
٨- متلفيش شعرك ٩٠ مرة ورا بعض الا لو بترقصى سعودى.
٩- متهزيش كتفك ٩٠ مرة الا لو بترقصى عراقى او خليجى.
١٠- الحركات الجريئة فى الرقص مستحدثة بدخول ثقافات الغرب ... متكتريش منها و متعمليهاش على أغانى أم كلثوم أبداً.
١١- مبنجريش.
١٢- نطة او اتنين بالكتير ... مش ترامبولين هو.
١٣- اختارى ايقاع واحد او اتنين بالكتير و امزجى بينهم بهداوة و لو الأغنية بطيئة ممكن تلاتة زى "نسم علينا الهوى ".... لو ماشية ورا كل الموسيقى اللى سامعاها هتقلبى زمبلك.
١٤- مترقصيش على حاجة مش حساها ... مش مهم حفظاها أد ما مهم حساها.
١٥- متبقاش الموسيقى تقطع الشرايين و انتى ضحكتك م الودن للودن ... حسى الكلام حبيبتى حسى.
١٦- عينك على جسمك و على جمهورك حتى لو شخص واحد .. اتأكدى ان اللى بتعمليه واصل لهم زى برزينتيشن عينك على الشاشة و على جمهورك ... لا انت شايف الشاشة ولا شايف حد م الجمهور بس آهو الايحاء مهم.
١٧- على رأى أنيس منصور - لا توجد فتاة مصرية لا تعرف كيف ترقص.
١٨- الرقص اجتهادات شخصية الا عند الألمان و الروس ... له قواعد ... و لأننا كمصريين بنكره القواعد ... بنقول عليهم جافين.
١٩- على رأي تحية كاريوكا .. الرقاصة البارعة هى اللى بترقص فى متر مربع ... و بنسميه رقص هوانم.
٢٠- الرقص بيحسن الذاكرة- بيساعدك تعملى قرارات أحسن - بيقلل آلام الضهر - بيساعد على الهضم - بيقلل تقلصات البطن و الجهاز التناسلى و آلام ال
Pms
بيحسن من نومك - بيقلل مشاكل البشرة ....
مش شرط خلاعة.
٢١- الرقص بيظبط حركة جسمك فى مشيتك و قعدتك و وقفتك - بيقلل الضغط و العصبية - تمرين قلب حلو جداً - بيزود قدرتك على التحمل بشكل عام.
٢٢- مرونة - توازن - بيظبط علاقتك بجسمك أياً كان شكله أو وزنه.
٢٣- حركات الاستعراض بندارى بيها على التعب و الإرهاق ... عززيها متكتريش منها عشان هيبقى شكلك بتأدى.
٢٤- النقل من حركة لحركة .. أهم م الحركة نفسها ... الرقصة زى لوحة فيها تفصيلة مش مظبوطة ... هتمررى التفصيلة لو اللوحة حلوة.
٢٥- الكلمات بتتحول لرقصة و الرقصة بتتقسم على الجسم كامل بالتساوى متخليش حتة أكتر من حتة بيبان ضعفك فى المناطق التانية.
٢٦- ارقصى على أجنبى حتى لكن مترقصيش ع المهرجانات اللى بيتنادى فيها أسامى دى.
٢٧- الشال - الصاجات - العصاية ... جزء م اللوحة مينفعش تبقى اللوحة كلها الا لو قاصدة " مسابقة او بترقصى للون معين " ... غير كده تبقى ماسخة.
٢٨- الفرق بين العالمة و الغازية ... العالمة متأسسة على ايد حد أكبر منها، الغازية دول اللى بيطلعوا عشوائى يغزوا الموالد ... فى الرقص خليكى عالمة.
٢٩- لو مش حاسة الموسيقى مترقصيش.
#ayatheminimalist
2
-2
