عايزة اتجوز

إسمحولي أخرج بره الإطار الكوميدي للمسلسل ده و أتكلم شوية عن إزاي إحتياج واحد ظاهر للناس قادر يخرب حياتك 

و الإحتياج هنا " عايزة أتجوز " 

أولاً طول ما في إحتياج عندك ظاهر للناس إعرفي ان بشكل تلقائي هتجذبي الناس اللي حابه تسده أو تستغله 

فضروري تكوني عاملة إطار لسداد الإحتياج ده عشان محدش يتعدى حدوده معاكي في محاولات لإستغلالك 

طيب 

لو هظهر للناس إني عايزة أتجوز يبقى أكون بيني و بين نفسي عارفة إني مش هتجوز غير بمعايير معينة … موجودة تمام مش موجودة يبقى كل شئ قسمة و نصيب 

= طيب بعد المعايير ؟ 

- بعد المعايير ضروري تحددي الزمان و المكان اللي هيتم فيه سداد الإحتياج و ليكن 

مش هتجوز قبل ما أتخرج 

مش هتجوز غير لما يتقدملي حد في بيتي على طول 

مش هتجوز غير في شقة تمليك 

إلخ 

= طيب كده ميبقاش تعقيدات ؟ 

- لأ بالعكس انتي كده بتعملي حدود للموضوع ده لأن لو فتحتيها ع البحري فالسوق مليان أشكال و ألوان و انتي هتتوهي في زحمة الإختيارات و هتلاقي نفسك مع الوقت و من كتر التعب و عدم تحديدك لمعايير بقيتي بتقعدي مع اللي يسوا و اللي ميسواش 

= طيب حددنا معايير و زمكان للموضوع أعمل ايه بعد كده ؟ 

- حاولي على أد ما تقدري تخفي إحتياجك ده تماماً و حبذا لو تقبلتيه و نقلتيه من كونه إحتياج لإنه يكون مجرد رغبة … 

ان تم سدادها …. خير و بركة، 

لم يتم …. فتمام.

= ليه ؟ 

- عشان من ضمن الشريحة المعروضة و اللي تتفعك في فئة كبيرة من النصابين و الجبناء عايزين يخطفوا و يمشوا … مش شايفين ان الكلمة ميثاق و ان الحب مسؤولية و ان الوقت كنز … الخ الخ 

بيكون شايف ان الحاجة اللي سهل أوصلها بدون وجع دماغ، أوجع دماغي ليه عشان أوصلها ! 

و انا مش بقولك الكلام ده عشان تعيشي في دور الضحية، انا بقولك ان دي نتيجة طبيعية للي انتي ظاهراه… ببساطة

= طيب و لو أخفيت إحتياجي ده هيفيدني بإيه ما انا بردو لازلت عايزة أتجوز !؟ 

- فتحتي لنفسك فرصة تكوين علاقات في إطارات خالية من أي ضغوط 

الرجالة عموماً مبتحبش الست اللي في دماغها تارجت، و لكنه يقدر أوي الست اللي عندها معايير 

الفرق بين الاتنين رايق جداً زي مثلاً 

التارجت …. عايزة أتجوز 

المعيار …. مش هتجوز قبل ما أحب و أتحب 

إخفى التارجت و إتعاملي بالمعيار 

هيحاول يثبت نفسه و يحقق المعيار كحركة طبيعية جداً لغريزة الصيد جواه و بقيتي إنتي التارجت 

—————

في الرحلة دي هتقابلي ناس كويسة بس مش نافعاكي 

و ناس كسولة مش عايزة تعملك تارجت 

و ناس تافهة بتضيع وقتك و خلاص 

و ناس مش كويسة خالص 

و غيره 

قيمي بقى و شوفي هتحطي كل إنسان فين من حياتك 

حد ينفع صديق

حد تمامه شغل

حد يادوب تقطعي معاه 

حد كويس ممكن تدخليه بيتك 

الخ الخ 

—————-

الفكرة هنا و المكسب ان بعد ما كان هما اللي بيقيموكي و أوقان كتير بيطفشوا منك، بقيتي إنتي اللي بتقيميهم و بتقرري مين يبقى فين و ليه و عشان ايه كمان