الزوجة التقليدية و فانتازيا الرجل

في فانتازيا بيعيشها كل راجل في محاولة لإنه يتجوز روقة و تمني شديد لإنها تستمر روقة و متتحولش لفاطمة في عبد الغفور البرعي

ليه الزوجة مهما كانت رايقة و لذيذة بتتحول بعد الجواز " التقليدي " و بتبقى عادية و مملة اوقات كتير

———-

بص حبيبي، الجواز التقليدي بيحتاج ست تقليدية، معندهاش طموحات شديدة برة إطار بيتها

و ده لأن الجواز بشكله ده بيفرض عليها اسلوب حياة معين و مهام معينة و بالتالي قدرات عقلية و نفسية معينة

بتختلف عن اي ست تانية بره الاطار التقليدي ده 

طيب 

خلينا نقول مين الست التقليدية عشان ده الدارج و بعدها نتكلم شوية عن الستات غير التقليدية و دول ما أكثرهم في الحقيقة و لكن لو حافظت عليهم بره منظومة الجواز التقليدي مش اكتر

" زوجات النبي مكانش في منهم ولا ست تقليدية "

———————

الزوجة التقليدية Tradwife 

هي ست بتقدر شغل البيت تقدير مبالغ فيه للدرجة اللي ممكن تفتح مواضيع حواليه تفضل ٣ ساعات بتتكلم عن الطبيخ او ٥ ساعات بتتكلم عن خبرتها مع الشغالات او لو هي طورت من نفسها جامد في المجال ده بتدي نصايح تقنية متعلقة بيهم 

لو حصل و الراجل مد ايده في البيت، كده هو بيهدد الوصف الوظيفي بتاعها و بيدخل على شغلها، فعادي تحضرلها العشا تلاقيها بتعملك دراما من نوع هو انا مت ! 

= يا ستي بحاول أكون رومانسي ! 

- هو انت مش سعيد معايا ؟ 

هتلاقي نفسك بتعمل حاجة و بتترجم عندها حاجة تانية خالص

في الوقت اللي شغل البيت مبيآخدش حيز من الفراغ عند الست الغير تقليدية هو مجرد مهارة حياة أساسية، و لو قومت بيه معاها او بدالها هترقصلك ٥ بلدي عادي 😅

——————-

الست التقليدية بتحب الأسرة و التجمعات و عندها مهارات التعامل مع الحموات و الأطفال

فتلاقيها معظم الوقت حياتها فيها ناس و فيها دوشة و فيها كلام و مهاترات و تعاملات و جدالات هنا و هنا و هنا 

ده طبعاً جميل و يتقدر و يتشال فوق الراس و يمكن ده من أكتر الحجات اللي بتخلي الراجل فخور بزوجته التقليدية 

و لكن كل ده بيصعب عليها انها تآخد مساحة لنفسها فتعمل ال 

Inner work 

اللي بيخليها ست ناضجة و رايقة 

و لو حاولت انت تديها المساحة دي ممكن هي تحس انها فقدت الأهلية 😅 

زي مثلاً انك تحاول تشيل عنها العيال! هتلاقي دراما من نوع انت مش عايزني معاكوا ؟ ! 

زي انك تحاول توديها عند مامتها ترتاح، هتلاقيها بتقولك انت زهقت من وجودي ؟ 

و هكذا 

فمع الوقت بيحصل فجوة في التفكير، لأن اللي هي شايلاه ده مش من اهتمامات الراجل خالص و في نفس الوقت المحتوى بتاعها هي الشخصي مبقاش موجود، بقى كله مقترن بالناس اللي في حياتها 

فهيقعد معاها يسمع عن فلان و علان و البيت و اللي محتاجه و فل على كده

الست الغير تقليدية هتتكلم معاها زي ما بتتكلم مع صحابك عادي في كل المواضيع لا هتكل ولا هتمل، شغل، دين، سياسة، فلسفة وجودية، تربية، سفر، كورة ….. كله شغال

—————————

الست التقليدية عشرتها لطيفة و سهلة، هي شغلها الشاغل أصلاً انها تخلي الناس في البيت كلهم مبسوطين و سعداء و الحياة ألوان مزيج من البينك و الأحمر و تحسها ملاك الرحمة كده 

الموضوع مع الوقت بيختلف و ده لأن إقامة بيوت سليمة مش معتمد على آدائك لوحده ! بقى معاكي أرواح ضروري تشغليها و تعلميها تتحمل مسؤولية و تأهليها للنضج 

فا لو حسيتي ان كل ما العيال بتكبر مشاكلهم بتزيد مش بتقل ! تبقي زوجة تقليدية 

الستات الغير تقليدية أقصى مشاكلهم في الخلفة بتكون الحمل و ده لأن بيتحكم في جسمهم حاجة خارجة عن إرادتهم مش أكتر 

بمجرد خروج العيل ده من بطنها، الجاي كله أمره سهل عادي.

———————

القائمة تطول، و لكن اللي يفرقلي في المواضيع دي هي انك تتخلى عن الفانتازيا بتاعتك لأن مش هينفع تحط إنسان في بيئة و تستنى ينتج منه انتاجات بتاعت بيئة تانية خالص.