عشان و هو صغير مكانتش أمه بتوجهله الكلام  

كانت بتتكلم بداله يا عيني فكبر فاهم ان الكلام بيتقال حواليه مش بيتقال له

و ده لأن الأمهات عندنا مقتنعين ان ده طفل و مبيفهمش إلى أن يثبت العكس

لما تتجوزيه بقى تبقي عايزة تتواصلي معاه بالكلام تلاقيه يقولك انا بتاع أفعال 

= يعني هو اللي بيعمل حاجة مينفعش يعمل التانية ؟!

- آه هو طاقتي كده خلصت أمال انتي فاكرة ايه ! 

= طيب انا متضايقة شوية و عندي مشاكل و و و 

- بس انا مش السبب فيها بتحكيهالي ليه ؟ قصدك تقولي انك مش سعيدة معايا وللا ايه !!

= طب بقولك انا عايزة اخرج شوية أغير جو 

- سيبي العيال عند مامتك و انزلي مع صحابك الدنيا بسيطة 

= طيب كنت عايزة فلوس أعمل شوبينج 

- انتي مش لسه واخدة فلوس و عملتي كذا كذا كذا 

——————-

هتلاقي دايماً ردوده مش مفهومة و انتي بتتكلمي في إتجاه و هو في إتجاه تاني خالص 

و يوم ما يحس مشاعر بيتخض على نفسه أوي ! 

انا حاسس كده ليه و الحل ايه و مفروض أعمل ايه عشان محسش بكده ! 

مع ان المشاعر دي اللي بتأكد انه إنسان طبيعي بس هو بيتعامل معاها على إنها دلالة انه مخنث و محدش فاهم ليه بردو. 

مقدرش أقولك ان ده توحد لأن مرضى ال autism اشتغلوا على نفسهم أكتر من ناس عادية كتير و أثبتوا كفاءة في مجالات عديدة كمان.