السلوك الإدماني بالنسبالي واحد

تعالوا الأول نقول تعريف الادمان " اضطراب في الدماغ يتسم بارتباط قهري بمحفزات نظام المكافأة في الدماغ بالرغم من النتائج الضارة " 

يعني ايه الكلام المجعلص ده ؟ 

يعني دماغك هي اللي بتعمل السلوك الادماني و بنعرف انه ادمان لما يكون نتايج بتاعته قابلة للقياس على جسمك و عيشتك و كلها مش حلوة 

يعني ايه بردو ؟ 

يعني لو اتكلمنا عن الجسم 

فمن أول أكل الضوافر و أكل الأكلات السريعة مروراً بالعادة السرية وصولاً لادمان المخدرات كلها حجات مضرة بالجسم و قابلة للقياس وبينتج عنها احساس حلو لكن نتايجها مش حلوة

طيب 

هتكلم عن نفسي كنت مدمنة قطم ضوافر و كنت مدمنة أكلات سريعة …. لكن بالنسبالي بعرف أتحكم في سلوكي الادماني 

عرفتي منين ؟ 

لما كنت اعرف اني نازلة نزولة مهمة كنت بوقف اكل ضوافري من اول ما اعرف 

و بالنسبة لل

Junk food 

مبآكلش كمية تخلي وزني يضرب مثلاً 

لكن لا زال من جوايا انا عارفة انه سلوك ادماني لأنه بيريحني و بيبسطني و كده 

طيب بالنسبالي اعالجه ازاي ؟ 

= لأ انا مكنتش مهتمة أعالجه الحقيقة 

- يا بنتي مش بتقولي سلوك ادماني ؟ 

= أيوه بس قولت بردو انه بيريحني و بيبسطني 

- ماشي بس مضر على جسمك 

= ليه منا بتحكم فيه عادي، لكن مش عايزه ابطله او مش فارقلي أبطله 

- طب ما كده غلط 

= يا سيدي انا حرة مزاجي كده كيفي كده … مش عافية أصلها 

نرجع لموضوعنا 

من سنة كده كنت بدأت خطوات التشافي من الجروح العاطفية و ظبطت حتة الأكل في اللايف ستايل بتاعي انا و الأولاد يعني ظبطت مطبخي و كده 

و الكلام ده بدوره أثر على السلوك الادماني بتاعي بشكل مباشر و بطلت آكل في ضوافري و قللت 

Junk food 

هل انا كنت عاملة خطة اني أسيب ادمان الحجات دي ؟ 

لأ ! بالعكس كمان انا كنت رافضة اسيبها 

لكن لاحظت انهم وقفوا لما اشتغلت على نفسي في حاجتين كنت لا يمكن أتخيل ان دي المحفزات بتاعتهم 

فلما بقى أكل البيت أنضف و أسهل و اسرع في التحضير و اوفر في الفلوس نتيجة اني ظبطت المطبخ …. دماغي اتجهت تلقائي ليه لأنه بقى بيريحني و بيبسطني 

و لما الجروح العاطفية خفت و مبقاش في حزن من ماضي او قلق من مستقبل مبقتش محتاجة ألجأ لحاجة سريعة عشان تهديني و تقلل التوتر.