" كتر الشواحن بيبوظ السوكت "
و في رواية أخري
" كتر الشواحن بيبوظ البطارية "
و تشبيهات عيانة تانية كتير بس احنا هنتكلم مع الناس المحترمين الأسوياء اللي مبيتعاملوش مع الأنثى على انها وحدة تفريغ شحنات !
————————
انت مقتنع تماماً ان العضو التناسلي الأنثوي فيه مشكلة لما يستخدم بشكل دائم ؟
معنى كده ان سيادتك مبتقربش لمراتك كتير كنوع من أنواع الصيانة ؟
هنستظرف ؟
——————-
طيب انت مقتنع ان الفكرة مش في الأعضاء و لكن في السائل المنوى الذكري ؟
أمال ٤ شهور العدة اتعملت ليه ؟ عشان محدش يبقى له عند التاني حاجة
نقطة.
——————-
لا يا آية انتي دماغك راحت لبعيد ! احنا نقصد المشاعر ! الست اللي بتتجوز كتير كده مشاعرها مستهلكة
= و الست اللي متجوزة راجل مبتحبوش ؟
و الست المتجوزة واحد و بتحب حد تاني ؟
و الست اللي بتحب واحد بيخونها و مكملة معاه ؟
و الست اللي بتحب واحد حيوان مثلاً مبيحسش ؟
كل دول مشاعرهم متصانة و الست اللي بتعدد زواجات هي اللي مشاعرها مستهلكة ؟
———————
المشاعر عشان تحافظ عليها لازم يكون مش مهم بالنسبالك العلاقة اساساً ! و يكون ليها ستاندرد متقبلش بأقل منه في التعامل
ما معناه ان الست متعددة الزواجات حريصة على مشاعرها أكتر من اللي بتكمل في أوضاع مقرفة
ثم ان المشاعر بتتجدد و بتنضج و بتتغير و بتتطور بالخبرة …
مش سلعة هي عشان يتم استهلاكها و تخرب !
بالعكس
———————
بس معروف عندنا ان تعدد الزواج للرجالة عشان يستحملوا ده و الست لأ
= تعدد الزواج من زمان للرجالة و الستات ، لكن الإسلام خصها بالرجال عشان إختلاط الأنساب
يعني متبقاش الست الواحدة بتخلف لكذا راجل و منعرفش ده ابن مين فيهم و تبقى مليطة ! يعني لأجل مصلحة الأطفال و الأمة الاسلامية
انما لو ع التحمل فمتنساش ان بيوت الدعارة زمان كانت مرخصة، يعني لو ع القدرة فهي كانت شغلانة بيمتهنها السيدات في وقت ما و كان معترف بيها
فلما تتكلم ع الستات في المواضيع دي بالذات
تحترم اللي بيعلمك الهوى و متعليش عليهم.
صباح الفل
2
-2
