انا واحدة من الناس المؤمنة تمااااااماً بان في القصاص حياة 

لكن عشان أقتص صح مينفعش يديرني الغضب ولا الانفعال ولا الصدمة

مهم القصاص ييجي من موضع توازن عشان اللي قدامي ميركبنيش و عشان لا انا أزود حتة ولا أقل عن حقي حتة 

فأُشفى تماماً 

تفعيل طاقة الحب جواك هو اللي بيوزن 

مثال : ابنك ضربك و انتي كده كده بتحبيه بس ضروري تربيه 

التربية دي لو جت من موضع غضب هتضربيه زي ما ضربك 

في حين ان جسمك أقوى من جسمه كتير … و هيزيد عليكي احساس بالذنب بعدين 

لكن لو من موضع حب 

هتمسكي ايده و تمنعيه يضربك و تفهميه ان كده غلط و ده هيكون كافي لحجمه و ضعف قوته 

مثال تاني : زميل ليك في الشغل اتسبب في قطع عيشك 

لو اقتصيت من موضع غضب هتلاقي نفسك بترفع قواضي و بتتخانق معاه و بتدفع فلوس ووقت و مجهود في حاجة مش مضمون نتيجتها 

لو اقتصيت من موضع حب هتبدأ تدور على مكان شغل تاني و فرص أفضل و أقيم و قد تبدأ شغلك الخاص و تدور على مصادر دخل تانية و غيره من الأفكار البناءة …. 

و هيفضل هو داير في فلك انك نجحت و تجاوزت و اتبسطت و هو علوضعه بيرازي في نفسه و بيقارن بينه و بينك. 

وصلت ؟