تعالى أقولك نوع الكومنتات بنفسيات أصحابها
١- حد بيقولك كلام عشان يوجعك بيه قاصد او بيدعي عليك في وشك
ده ببساطة حد حاسس انه مخدش حقه من الدنيا و انك اقل من اللي انت وصلتله في حين انه أعظم منك بمراحل ف ليه انت هنا و هو هناك !
بطريقته دي بيحاول يشفي غليله لعلك تتأثر و تحسسه انه مهم و مؤثر زيك، فيبقى ده الشخص اللي أثر فيك و انت الشخص اللي بتأثر في ملايين و كده بقى.
—————-
٢- حد بيحاول يقل من انجازاتك اياً كانت ايه هي، سواء نظرية او رأي او دراسة او او او
ده ببساطة الحد اللي مش عارف يكون على مستوى الكلام معاك، فالأسهل انه ينزلك لمستواه فتعرفوا تتكلموا مع بعض
———————
٣- حد بيعمم و يأڤور و هو بيأكدلك انك بتعمم و بتأڤور، او حد بيغلط فيك و يزعل لما تغلط فيه و يأكدلك انه مغلطش فيك
ده شخص بيسقط اسقاط واضح قابل للقياس ! زي ما بيقولوا تلهيك و تجيب اللي فيها فيك
——————-
٤- حد بيكتب كومنت في ١٠ الاف سطر، ده المحنك اللي رافض تكون فاهم اكتر منه و عنده وجهة نظر عملها في الحمام و بيتمنى توصل للدنيا كلها، فبدل ما يتعب على دراستها و توصيلها بكلمتين ، قرر يكتبهالك في موضوع تعبير مفيهوش اي احترام لوقتك و لوقت القارئ
ده حبذا لو تديله ريق حلو، بس بدون ما تضيع وقتك في قراية
اديله وردة
———————-
٥- اللي شاف اللي قبله كتبوا ايه فكتب زيهم، ده مفيش اكتر منه ده
بيساطة لأن استراتيچية الفيسبوك هي انها بتعمل تابع
فالتابع هيبقى تابع لأي حد و خلاص
لو مش بيحبك فهيشوف مين ضدك و يبقى تابع له
لو بيحبك هيشوف مين معاك و هيبقى تابع له
فمتطمنلوش أوي عشان النهاردة معاك بكرة عليك حسب الغزالة و كده.
——————
٦- اللي داخل يحلو عليك و يقولك يابااااي كل شوية تظهريلي و اعمليلي بلوك و اوف و اح و الجو ده، ده عيل حكاك هيموت و تكلمه فبيحسسك انه جاي مغصوب " عيني فيه و اقول اخيه "
———————
٧- الناس المحترمة بتقول رأيها في سطرين بموضوعية و بشياكة سواء اتفقوا او اختلفوا ، رأيهم نتيجة خبرة و تجربة عشان كده بيصيغوها ببساطة و بينصحوا في الرسايل مش في العلن و بيقدموا الدعم للحجات اللي بتعجبهم، و مبيتفرجوش على حاجة بتصير شئ سئ جوا نفسهم
و ده ببساطة لأنهم فاهمين ان كل دي منصات، و أي منصة ييتم عرض عليها من كل الحجات، فانت المتحكم الوحيد في اللي بتتفرج عليه و بتتابعه.
2
-2
