الحياة بعد الطلاق

" الحياة بعد الطلاق مش وردي " 

طبعاً أول حاجة هتيجي في بالك اني بقولك الحياة مش وردي تبقى أكيد غامقة 

بس الحقيقة لأ ????

انتي بتختاري اللون حسب مزاجك فمش قصتنا دلوقتي 

تعالي أقولك ان أول حاجة بتشغل بالنا الأمهات اننا نعيش الأولاد في نفس المستوى المالي اللي كانوا عايشين فيه 

عشان منحسش ان الطلاق مأثر عليهم بشكل مباشر فمنحسش بالذنب تجاه القرار نفسه و نحس اننا كنا أنانيين و ظلمناهم 

في حين ان مفروض يكون كل تركيزنا هو ان علاقتهم بباباهم تستمر و تفضل علوضعها و يقضوا كواليتي تايم عشان ميحسوش بغيابة مؤذي … الا ان حتى ده مش مضمون ولا ليكي تحكم فيه 

انتي مجرد بتسعي  

لكن الفلوس …. الفلوس أمرها سهل 

= إزاي يا آيه الموضوع مش سهل خالص ! 

- الموضوع مش سهل عشان انتي بقيتي مسؤولة عن بيت كامل بعد ما كنتي مسؤولة عن لبسك و الميكب بتاعك و فل على كده 

= طيب و هي دي حاجة سهلة ؟!! 

- لأ طبعاً عليكي مش سهلة الا انها عملية طبيعية لأي شخص بينضج و عايز يستقل 

يعني لو فكرتي تسافري برة مصر هتمري بنفس المرحلة 

لو فكرتي تغيري المحافظة اللي عايشة فيها هتمري بنفس المرحلة 

لو فكرتي تسيبي بيت أهلك و تسكني في ايجار عشان بتدرسي في جامعة معينة هتمري بنفس المرحلة 

كل الفرق ان كان في ناس مسؤولين عنك فمش بتفكري لنفسك 

و ده غلط ! 

= لا بس وجود اولاد ميتقارنش باللي بتقوليه ده 

- انا كنت فاكرة زيك كده … و فضلت اقول لو مكانوش معايا كان هيبقى الوضع أسهل … 

الحقيقة ان لأ خالص ! مفيش حاجة كانت هتبقى أسهل خالص بالعكس 

وجودهم بيديكي نوع من الحرية مش متوفر لست عايشة لوحدها و بيكفيكي شر حجات كتير و ناس كتير بدون ما تاخدي بالك 

يكفي ان أسرتك كاملة بيت و ام و أطفال مش حاسة انك عايزة تأسسي م الأول تاني 

و انك عايشة العزوة و زينة الحياة الدنيا اللي في ناس حارمة نفسها منها بمزاجها ظناً ان من غير الاولاد الفرص أحلى ! 

و مش هكلمك عن جمال الفرص بيهم و الكواليتي بتاعها بقى ولا هقولك عن رزقهم و الحجات دي عشان دي حجات يشوفها اللي عايز يشوف بس 

اللي عايز يشتكي مبيشوفش.