من التجارب اللي خوفت منها جداً جداً في موضوع الجواز ده هي الإجهاض … يمكن اكتر من ولادة جنين داون مثلاً أو أياً كانت مشاكله
بشوفها تجربة مؤلمة جداً لدرجة قلبي مبيعرفش يستوعبها !
مع انها نتيجة طبيعية جداً لأي شئ غير مكتمل
و مع انها كمان واحدة من سنن الله في الكون
علاقات حب غير مكتملة فبتجهض
مشروع غير مكتمل بيجهض
طول الوقت حوالينا حجات بتنتهي
بس في حاجة بقى
معنى ان الحاجة بتجهض لعدم اكتمالها ده دليل ان العيش في حد ذاته نوع من أنواع الكمال !!!
فتخيل انت هنا لأنك مكتمل !
هتقوللي الكمال لله وحده
هقولك كمال الله بيتجلى في جميل صنعه ????
انت هنا لأن ربنا الكامل خلقك بنواقصك
فهل انت ناقص لكسل منه او عجز عن خلقك انسان كامل بمفهومك الضيق ! إطلاقاً
فمالك انت مش حاسس بقيمة نفسك و بوجودك و بالعيش في حد ذاته كنوع من الكمال !
الموت موجود عشان يأكدلك ان الحياة نعمة و الإجهاض موجود عشان يأكدلك ان الاستمرار نعمة
هل كلامي معناه ان الاجهاض و الموت مفاهيم سيئة ؟
بالعكس
في ناس بتتمنى الإجهاض في حالة ان الجنين غير شرعي مثلاً او علاقتها بالشريك وحشة بل و بيروحوا يعملوا ده بنفسهم اوقات
و في ناس بتقتل نفسها
بس ببساطة دي حجات عكس فطرتنا
فطرتنا هي اننا نعيش اللحظة بكل تفاصيلها و نستسلم ليها كل الاستسلام عشان نخوض التجربة الانسانية بكل ما فيها و نوصل لأغرب المشاعر الانسانية و أحلاها ♥️
2
-2
