دموع كابتن يحيى

زعلانين علشان ضربات الجزاء موصلتناش كأس العالم .. طيب إيه قولكم أن ضربات الجزاء خرجتنا من دور 8 فى كأس العالم لكرة اليد .. كان منتخبنا متعادل مع الدنمارك بطل العالم ولعب شوطين إضافيين وضربات جزاء ،، كابتن المنتخب الأسطورة أحمد الأحمر ضيع وكابتن على زين ضيع وراح الماتش للدنمارك .. وكابتن يحيى الدرع دموعه بقت ترند يومها .. 

لكن فى كرة القدم أقصى طموحنا نصعد كأس العالم مش ننافس ،،، ليه لأن منظومة كرة القدم مبتخدمش المنتخب ولا طموحاته ،، كلها عك وفهلوة ومصالح شخصية وتحيز وتربيطات .. مفيش أى محاولة علشان نتقدم .. المسئولين بيناموا ويصحوا أن عندنا تصفيات كأس العالم هنلعبها كمان كم يوم .. بدون أى استعداد ،،، لما يكون فى مقدمات معقولة هتكون النتيجة معقولة .. نفس الوجوه فى المشهد الكروى هى هى من عشرات السنين ، كم برامج واستوديهات تحليل مشفنهاش لأى لعبة ..

اللى يقول كرة اليد أسهل من كرة القدم ،،، المسئولين عن أى لعبة لو عايزين يرتقوا بها ويرفعوها هينفذوا .. تابع صفحة اتحاد اليد مثلا هتلاقى مواعيد مباريات مضبوطة ، كم مسابقات رهيب ومباريات بعدد كبير لكل الفئات بنين وبنات .. مفيش تأجيل لفلان ولا تغيير ملعب لعلان .. المناطق بتجتمع بالأندية وتسأل طلباتهم إيه ؟ 

اللى عايز يحترف بيحترف ،،، مفيش فريق بيقف على لاعب ولا 2 لأن عنده بديل جاهز ..

وفوق ده اللعيبة و الأجهزة الفنية بتحترم بعضها وعندهم روح رياضية .. مفيش حاجة اسمها مش هستلم ميدالية المركز التانى ..

علشان تاخد دورى فى اليد بتلعب مع كل الفرق وبيضاف إليك نقاط من ناشئين 2002 و2004 وفى الدور التانى بيختاروا أفضل 6 يلعبوا مع بعض رايح جاى ،، المرحلة 3 للحسم أفضل 4 بيلعبوا دورى تالت رايح جاى واللى هيجمع نقاط أكتر فى المرحلة 3 هياخد الدورى .. ورغم مآخذنا على اتحاد اليد بخصوص نظام البطولة دى لكن يحسب لهم انتظام المسابقة .. وحيادية الاتحاد ..

أن منتخب مصر لليد يصعد كأس العالم ده شىء معتاد ،،، لكن يظل المعتاد فى اليد طموح وأمل منشود لمنتخب القدم ، لأن منظومة القدم الكلام أكتر من الفعل ..  منظومة بتاخد اهتمام أكبر بكتير مما تستحق .