كابتن طارق محروس المدير الفنى للأهلى أقيل بناء على طلب الجماهير ،،  وده شىء وارد فى أى لعبة وفى أى نادى ،، المشكلة أن كتير على مواقع التواصل شغالين سخرية منه وتشكيك فى قدراته كمدير فنى متميز .. كابتن طارق واخد برونزية كأس العالم مع منتخب تحت 21 سنة 2019 ،، واخد بطولات محلية منها كأس مصر مع طلائع الجيش   ،، وواخد مع الأهلى كأس إفريقيا السنة اللى فاتت ،،  للأسف وصل الأمر أن فى عناوين طلعت إقالة المدرب الفاشل  !  وتعليقات أنه مبياخدش بطولات ،،، ودى مشكلة اللى مش متابع .. يعنى أنا فاكرة أنه واخد كأس مصر السنة اللى فاتت مع الأهلى .. وخسر الدورى السنة اللى فاتت فى مباراة فاصلة بفرق هدف ،،  طيب فين المشكلة ،،، لما الزمالك فيه ٧ لاعبين تقريبا من المنتخب يحيى وسيف الدرع ووسام سامى وحسن قداح وكريم هنداوى ومحمد طارق وأكرم يسرى أحمد مؤمن صفا وبكار ويقودهم الأسطورة أحمد الأحمر ... معنى كده أنه  بيلاعب  نصف المنتخب ،،، شباب ووسط وكبار ..  فالأهلى لو خسر  فى اليد مش لأن فريقه ضعيف لكن لأن فريق الزمالك أقوى  ،،  مشكلة الجماهير بيقيسوا كرة اليد على كرة القدم ،،، وييجوا يتكلموا عن اليد يحودوا على القدم ..