ماذا بعد حصول الزمالك على كأس الكؤوس الإفريقية لكرة اليد ؟

ألف مليون مبروك لكوماندوز اليد والجهاز الفنى والجماهير والإدارة الفوز بكأس الكؤوس الإفريقية 

أوليفر روى ،، ناس كتير انتقدت وقالت لازم يمشى ،، على اعتبار أنه ضيع بطولتين كأس مصر وكأس السوبر الإفريقى.. وفى أصوات وأخبار بدأت تقول كابتن مجدى أبو المجد هيكون المدير الفنى. الجديد للفريق ..

واحنا كجمهور بندعم الزمالك وبندعم فريقنا أياً كان مديره الفنى ..

لكن عايزين واحنا بنطالب بتوقيع أقصى العقوبة على اوليفر نفتكر الآتى :

أولاً : الدورى المصرى كان نظامه صعب جدا ومرهق لأبعد الحدود ..

إنك تقابل الأهلى ٥ مرات وسبورتنج والطلائع .. وضيف عليهم البنك وسموحة ٣ و٣ ... طبيعى تحصل إصابات للاعبين ، طبيعى الفريق ميكونش موفق ماتش أو ٢ .. مع ذلك الفريق متهزمش فى أى مباراة بالدورى .. 

ثانياً : بالنسبة للكأس المواعيد كانت منتهى الصعوبة ، ماتش البنك الأهلى ، البنك كان له فترة مريح ملعبش .. وفريقنا كان لسه لاعب ماتش الدورى بكل ما فيه من إرهاق وضغط قبله بكم يوم ،، تخلص دورى وتطلع بعدها بكم. يوم على قبل النهائى وتانى يوم تلعب نهائى .. الساعة ١١ فى رمضان ،،،  

ثالثاً : لما تلاقى نفسك بتلعب بطولات محلية مش بتخلص والموسم ممتد ، دورى وكأس .. وبعدها قالوا بطولة جديدة اسمها سوبر محترفين ولسه فى بطولة اسمها سوبر محلى ،،، أنت بتلاقى الماتشات كترت ولو أنت مدير فنى مش هتلاقى وقت تجهز الفريق بدنياً .. هتحاول بأقصى طاقة ، لازم تقع مرة مثلاً .. والأدهى أن السوبرات دى بتتلعب بنظام دورة مجمعة ،، ٣ أيام متتالية .. وبعد ٣ بطولات محلية فى بطولتين إفريقيتين لازم يجهز لها .. 

رابعاً : بالنسبة لرفضه فكرة الدعم بمحترف قلت قبل كده إن معه لأن مستوى آسيا وأفريقيا فى اللعبة عموماً أقل من مصر ، وأن المصريين معديين بمراحل ، حتى لو متوفقش فى ماتش السوبر لكن الماتش كان قريب منه ، رغم أن الأهلى تعاقد مع ٢ محترفين بالإضافة للجزيرى واستعار حارس مرمى سبورتنج ،،، ومع ذلك الحمد لله فريقنا فاز ببطولة من ٢ ..

خامساً : صحيح خبرات اللاعبين بتفرق لكن اعتقد أن أى مدير فنى لازم يكون له بصمة ودور .. 

سادساً : أى مدير فنى بيمسك الزمالك بينافس ،، واحنا السنة اللى فاتت بعد ما كسبنا الدورى فى ماتش فاصل ، لعبنا الكأس بعده بأسبوع وخسرنا ،،، فأى مدير فنى ممكن يخسر مباراة وتكون مباراة بطولة .. مفيش فريق بيكسب باستمرار بلا خسارة أو تعادل ..

سابعاً : شفتم أرضية الملعب فى النيجر عاملة إزاى ؟ عرفتم أن هتلر ولوكا والدرع والله أعلم من تانى كانوا مصابين ؟

فاحنا كجمهور لازم زى ما بنشوف البطولات سهل تييجى للزمالك ، لازم نهتم بالعقبات والتحديات ونبروزها ونقول لهم : شكراً أنكم اشتغلتم فى الظروف الصعبة دى وأسعدتونا ..

شكراً أوليفر روى ..

كل الدعم لنادى الزمالك .. وكل التوفيق بإذن الله لكوماندوز اليد ..

????????????????????