فريق كرة اليد لعب السنة دى فى ٦ بطولات أول الموسم كان السوبر الإفريقى وفاز به وبعدها لعب فى كأس العالم للأندية لكرة اليد ، وبعد كده بدأت مسابقة الدورى وفاز بالدورى ،  بعد الفوز بالدورى ب ١٠ أيام لعب  قبل نهائى ثم نهائى بطولة كأس مصر .. البطولة اللى سبورتنج فاز بها ، بعد الماتش لاعبى الزمالك وسبورتنج سلموا على بعض ، وفى مراسم التتويج فريقنا استلم ميدالياته الفضة بكل روح رياضية فى لعيبة لبستها زى كابتن مؤمن صفا وكابتن حسن قداح وكابتن فلفل وكابتن محمد طارق وغيرهم وفى اللى استلموها وسلموا على أعضاء اللجنة زى كابتن أحمد الأحمر ، لما قرب دور كابتن يحيى الدرع كان كابتن حمادة عبد البارى قرب على المنصة وأعطى له الميدالية ، سلم على اللجنة وخدها وهو فى ذهول إلى حد ما .. 

وأكيد كل اللى متابع الصالات شاف كابتن يحيى عمل إيه يومها فى الملعب كان نفسه يحقق كأس مصر مع الزمالك .. لكن ربنا قدر وكانت البطولة لسبورتنج .. فريقنا خد الميداليات من سكات .. مقتنعين أنه فعلاً مكنش يومهم ..

وكل جمهور الزمالك نام زعلان علشان  الكأس اللى راح وجهود كابتن يحيى الدرع  اللى بذل جهد كبير جداً هو وكابتن أحمد مؤمن صفا ..

 أنت متخيل الكارثة فريق الزمالك اللى يضم ٩ لاعبين عالميين يخسر الكأس .. متخيل فريق مخسرش حوالى ٣٧ مباراة يخسر نهائى ؟ آه متخيل ، لأن الحياة مبنية على الثنائيات المكسب والخسارة ، الحزن والفرح ، العسر واليسر ، الشدة والضيق .. مفيش حاجة اسمها تكسب دائماً .. أو تخسر دائماً ..

وهى البطولات انتهت لحد هنا ... لا الزمالك لعب بطولة سوبر المحترفين ، دورة مجمعة وهزم سبورتنج وهليوبوليس والأهلى وخد البطولة والفريق اللى كان أول الدورى وتانى الكأس رجع لمنصة التتويج بالسوبر .. 

بعدها راح خسر السوبر الإفريقى .. وخد مركز تانى ،،، متلككش بالظروف والحرارة والأجواء والتحكيم وإنهم بيلعبوا فى بلد أساساً مفيهاش ملعب واحد محترم .. مقدموش احتجاج إنهم كان لازم يلعبوا السوبر فى مصر الأول .. الخ ، كل اللى كانوا عملوه إنهم كتبوا مذكرة للاتحاد الإفريقى بالصعوبات والمشكلات اللى بتواجههم .. وبعد المباراة مسمعناش أى أعذار .. 

 أبطال الفريق زعلانين أكتر مننا ، لكنهم قرروا أنهم ميرجعوش إلا بكأس الكؤوس .. علشان يفرحوا ويفرحونا وفازوا فى المباراة النهائية ووقفوا على المنصة واستلموا الميداليات الذهب ..

 احنا بنحكى الحدوتة دى كلها ليه ؟ 

علشان نقول لكل رياضى فيكِ يا مصر خللى عندك شجاعة وزى ما بتقف على منصة التتويج فرحان بالذهب ، تماسك وأقف بالفضة مش عيب والله .. لأن العيب أنك تقلل من المنافس وتشوفه ميستاهلش .. أو أنك تتغاضى عن سلبياتك وسلبيات فريقك وتقول أنك عملت كل حاجة .. الخطأ أنك تكون رياضى ومش مدرك إن الرياضة مكسب وخسارة .. دور على الخلل فين ، وصحح الأخطاء .. هتلاقى نفسك فى يوم فرحان بالذهب زى كوماندوز اليد  ،  و الاخلاق الرياضية هى أبسط شىء لازم يتحلى به الرياضى  ????????????????????????????????