و كأنها معركة ؟!

 

لما سلطوا الليزر على عيون لاعبى السنغال كان تصرف مش حلو ،، لو معندكش لاعبين تقدر تكسب بأدائها يبقى متتمناش تتأهل ،، حضرتك رايح  تساعده و تشجع مش رايح تضايق الخصم .. 

 

الهتاف لصلاح لحظة نزول مانى  ... شىء غريب وكأنها معركة ما بينهم وشغل فتوات اسم الله عليه .. اسم الله عليه ،، فى حين أننا شفنا طفل سنغالى منهار من البكاء علشان محمد صلاح خسر نهائى إفريقيا ..شعب طيب وجميل عيب  نخسره علشان ماتش كرة ..

 

أحترم الجمهور اللى شجع مصر بقلبه وكان شاغله تشجيع المنتخب أكتر من مضايقة منتخب السنغال .. وأكيد هم أغلبية ،، لكن للأسف أى مجهود جميل بيعملوه  بيتشوش عليه من المتعصبين ..

 

الصفحات شغالة شحن إنه الثأر .. وحقنا .. وقلبوها شروق يوم العملية وغروبها ... وكل الناس دى هاجمت إيتو لما قال للاعبى الكاميرون على مباراة مصر إنها الحرب .. لكن عادى احنا ندق طبول الحرب ،، إعلام وصفحات غير رياضية ونوصل للجمهور لازم الحسم. بأى شكل ..

 

 دى رياضة يا جماعة والله ،،، مكسب وخسارة .. أخلاق زى ما بنسمع  .. 

تعليق مدحت شلبى كان منتهى  منتهى السخافة ،، بالذات وهو يقسم بالله إن لاعبنا مرتكبش خطأ وفى الإعادة يقول أن كانت خفيفة يعنى .. كم استظراف  مكنش مطلوب .. 

 

 بلدنا اللى كل الناس بتتكلم عن طيبة شعبها و كرم ضيافتهم إزاى يتصرفوا بالشكل ده .. هيقولوا 70 ألف فى المدرج هنتحكم فيهم إزاى .. لما تعمل إعلام رياضى حقيقى وتشيل شلة المنتفعين وتخلق منظومة كروية حقيقية  مبنية على احترام الآخر ..  

لما تعلم النشء  شجع فريقك أو منتخبك من غير ما تغلط فى المنافس .. 

احنا بنحب بلدنا وبنشجع المنتخب بس مش على طريقة مدحت شلبى وشوبير  وغيرهم .. نتمنى لهم المكسب والصعود بأدائهم  بإذن الله ..