شايل على كتفي الهموم متجسمة
ومقسمة عمري على هيئة وشوش
متبسمة
ووشوش غريبة ومبهمة
ووشوش حزينة وحزنها من غير ألم
مكتوب على جبينها العريض
عيشوا الحياة من غير عشم
ووشوش بتتمسكن وهي بتجرحك
وتفهمك إن أنت قاسي وقسوتك
ظلم وغشم
ووشوش بتبكي عيونها بس بدون دموع
ووشوش بترسم فوق ملامحها الجريئة
طهر خشوع
وشوش عجيبة ووشوش كئيبة
ووشوش بتضحك بس من جواها
حاسة بألف خيبة
وانا بين دا كله بدون ملامح تتقري
أصل الحياة بتكون يا واحد عاش برئ
أو عاش جرئ على خلق ربه بيفتري
ظالميني يا اللي تقولوا عني
عايش وعيشتي من النعيم ومن الترف
انا شوفت إيه في الدنيا غير ذل وقرف؟!
طب قولوا انتوا..
راضي بحكم هتحكموه بس بشرف
هو اللي شاف في الدنيا ظلم من الخلايق
مش سهل عينه من التراب يوم تنطرف